Kam u Bah Sniawbhalang ka NPP kan jop ia ka samoi MP Lok Sabha

U National Vice president President ka National People’s Party (NPP) uba dei ruh u Symbud Myntri Rangbah ka jylla u Bah Sniawbhalang Dhar u la pynpaw ia ka jingshaniah ba ka party kan jop ia ka ilekshon shiteng samoi MP Lok Sabha ban wan, da kaba ai burom ia ki nongtrei jong ka Party kiba iai bteng ban trei ia la ka kam ha kylleng ka jylla Meghalaya.

Haba kren sha ki lad pathai khubor u Bah Sniawbhalang ula ong, “Ngi sngewskhem bha ban jop ha kane ka kynti da ka jingkyrshan jong ki paidbah jong ngi. Na ka liang jong ka party, ngi hap ban trei shitom. Nga ai khublei shibun ia baroh ki Unit bad ki nongtrei ka Party haki kyrdan bapher bapher ha baroh ki constituency. Ki unit jong ka NPP ki la trei shitom bha. Kumta, ka dei ka dak kaba bha bha na ka bynta ka ilekshon MP shiteng samoi” ula ong. Halor ki jingkylli halor ka jingbym buh kyrtong daki kynthei, u Bah Sniawbhalang u la ïada ïa ka rukom jied kyrtong jong ka NPP.

U la ong ba ia kane ka rai la shim hadien ba la pan jingmut na ki Unit jong ka NPP na kylleng ka Jylla.“Kata phi lah ban kylli na ki. Na ka bynta ka NPP, ngim ju rai tang daki nongialam ba halor tam jong ka Party. Ngi ju sngap beit ia ki jingai jingmut na baroh ki unit jong ki 36 tylli ki constituency, ki la ai jingmut iaka kyrteng jong u Dr DRL Nonglait bad ngi hap ban pdiang ia kata” u la ong.U la kynthoh ruh halor ki khubor ba dang shen ba ki nongkyrshan jong ka VPP ki la kynriah sha ka NPP, khamtam ha ka thain Khasi-Jaintia.“Hoid nga la ïohi ïa kata. Khamtam ha ri lum Jaiñtia, kala hiar haduh katta katta, wat ha ri lum Khasi ruh, man la ka sngi ka jingdon ki nongkyrshan ka VPP kala nang hiar ha kylleng ka thaiñ Khasi-Jaiñtia kumba ki briew kila sdang ban sngewthuh,” u la bynrap.