Kynmaw burom ka NEIAH I’u Dr. Christian u nongseng ia ka Homoeopathy

Ka North Eastern Institute of Homeopathy and Ayurveda Shillong ka la pynlong ia ka “March for Homoeopathy” ban kynmaw burom ia ka sngi sumar dawai kynbat ha pyrthei ne World Homoeopathy Day kaba ju rakhe man u snem ha ka 10 tarik Iaiong kum ka jingkynmaw burom ia u Dr. Christian Friedrich Samuel Hahnemann u briew uba la seng ia ka Homoeopathy. Ha ka jingiaid paidbah la iashim bynta 200 ngut ki samla pule, ki doktor bad nongtrei jong ka NEIAH bad shwa ban iaid la kaweh lama da u Deputy Director ka NEIAH u bah A Wanshai Shynret ha ka jingdonlang u Dr. Tapan Nath, ophisar Assisting Principal, College Homoeopathy, NEIAH Shillong bad katto katne ki nongtrei ba la rangbah ban iaid lyngba ka Khyndai Lad, Polo bad pynkut ha madan Golf Link Club.

Mynta u snem ka pyrthei ka rakhe ia ka jingdap 270 snem jong u nongseng ia ka Homoeopathy, u Dr. Christian Friedrich Samuel Hahnemann halor ka phang, “Ka Jinghikai bad ka jingwad bniah”. Kane ka sngi ka burom ruh ïa ka jingtrei shitom jong ki nongsumar homeopathic bad ka ïarap ïa ki briew ban sngewthuh ïa ka jingpyndonkam ïa ki dawai homeopathic. Ka North Eastern Institute of Ayurveda and Homeopathy (NEIAH), Shillong, ba dei ka Autonomous Institute ba don hapoh ka Ministry of Ayush, ka sorkar India, ka thmu ban pynlong ïa ki jingïalehkai ban rakhe ïa ka World Homeopathy Day 2025 ba kynthup ïa ka seminar ban ai jingkren da ki riew shemphang halor  ka Homoeopathy, ia kop kyntip, shna poster ki samla pule ha Mawdiangdiang.

Ka NEIAH ba long kawei na ki Hospital bad ka jaka sumar ba pawnam ka la ai ka jingshakri jong ka sha ka imlang sahlang naduh ba la seng ïa ka ha u snem 2009. Ka ai ka jingshakri ha ka koit ka khiah jong ka OPD bad IPD bad ka pynlong ïa ki prokram wad bniah bapher bapher kynthup ïa ka jaka sumar bad dang shen ka la plie ruh ïa ka OPD ba marjan ha Smit. Ka NEIAH ka ai jingshakri ha ka pule puthi ia ki samla pule na kylleng ka ri India kiba la wan pule ia ka kyrdan UG bad PG ha NEIAH, Shillong.