Ai ka Iing dorbar da ka kali ban shakri ia ki nongpang HIV/AIDS

Ka iing dorbar thawain ka jylla hynne ka sngi ka la ai ka kali Mahindra Bolero sha ka Meghalaya AIDS Control Society (MACS) na bynta ban ai jingshakri ia ki briew ba don jingpang HIV/AIDS ha ka jylla. U Additional Secretary jong ka Meghalaya Legislative Assembly u Malthus S. Sangma ba la mihkhmat ia u Lamphang ka iing dorbar u Thomas A. Sangma ula aiti ia kane ka kali ha u Dr. Wallambok Langstieh u Project Director jong ka MACS ryngkat ka jingdonlang kiwei ki ophisar. U Lamphang ula shimkhia ban pynbiang ki lad shakri ban iakhun pyrshah ia ka jingpang HIV/AIDS ha ka jylla.

Ia ka kali yn pyndonkam da ka Meghalaya State Network of Positive People (MSNP+) ban buddien ia ki riewshimet ba hap ha kyrdan Loss to Follow-Up (LFU) bad ban pyndonkam ha ki prokram pynshai paidbah ha kylleng ka jylla. Haba kren u Malthus S. Sangma ula ong, “Ngi ai ia ka kali Bolero sha ka Meghalaya AIDS Control Society bad nga sngewkmen ban aiti ia kane sha ki ophisar ka MACS.  Ka dei ka jingangnud ba la slem don ka kali ban leit ha ki thain nongkyndong ban shakri ia ki briew ba don jingpang HIV kiba mad ia ka jingeh ban ioh ia ka jingsumar ha Shillong”.

Ula bynrap lyngba kane ka kali kin lah ban leit ha ki iing ban ai jingsumar ia kiba donkam khamtam ki thain nongkyndong bad ki jaka ba sha jngai. Nga kyrmen ba kane ka jingai ba rit da ka jingiarap u Lamphang, kan ai jingshakri ha ka jingiakhun pyrshah ia ka jingpang HIV/AIDS ha ka jylla”.