Hiar shuki Pro-Vice Chancellor ka Prof. Sherwin Sungoh

Ka Prof Sherwin May Sungoh ka la rai ban iehnoh ia ka kam Pro-Vice Chancellor jong ka skulbah North Eastern Hill University (NEHU) bad tyrwa ban shimti tang ia ka kam kum ka Vice Chancellor In-charge ka NEHU. Ha ka shithi ba la phah sha ki bor ba dei peit, ka Prof Sherwin ka pynpaw ba ka jinglong jingman ha NEHU dang khluit bad ki don ruh ki jingdawa na ki kynhun bapher kaba buh jingeh kumno kan treikam kum ka Pro-Vice Chancellor hapdeng bun ki jingeh bad ki jingtynjuh bapher bapher. Halor kitei ki daw ka la rai ban phah shithi iehnoh kam kum ka Pro Vice Chancellor bad kan treikam noh kum ka Vice Chancellor (In-Charge) katkum ka hok kaba la pynkup bor khamtam ba ka dei ka professor ba la rangbah duh ha ka kam.Ka pyntip ia ki jingeh ba ka kynduh namar ka jingbym wan trei u Vice Chancellor u Prof Prabha Shankar Shuklar bad kam donbor ban pyniaid ia ki kam pisa na bynta ban pyniaid beit ia ki kam ka skulbah.

Dang shen, ha ka 8 tarik u Iaiong, ka North-Eastern Hill University Students’ Union (NEHUSU) ryngkat bad ka Khasi Students’ Union (KSU) NEHU Unit, ki la dawa na ka Professor Sherwin Sungoh ka dei ban iehnoh ia ka kam kum ka Pro Vice-Chancellor jong ka NEHU Shillong Campus bad ki la ong ba ka jingshah thung ka Prof. Sherwin kam long satia katkum ki kyndon treikam jong ka skulbah. Ki la kam ka jingthungkam ia ka Prof Sherwin, ka dei ba la pynbeit da ka bor pyniaid u Prof. Shukla kaba long be-ain, namar ym shym la thung da ka jingbun paid (Quorum) ka Executive Council kaba long pyrshah ia ki kyndon treikam.

Ki samla pule ki la dawa ia ka Prof. Sherwin Sungoh ban hiar shuki noh kum ka Pro-Vice Chancellor ryngkat ka byrngem ban pynlong ki jingiakhih ba tyngeh.