Shimti ka tnad Tourism ia ka ‘Nan Polok’, yn plie haduh 10 baje mynmiet

Ka tnad Forest & Environment ka Sorkar Jylla hynne ka sngi ka la ai noh ia ka Nan Polok lane ka Ward’s Lake sha ka tnat Tourism ban pynïaid ia ki kam nangne shakhmat. Kane ka long kum shibynta ban khirng shuh shuh ia ki nongwan jngohkai pyrthei hapoh ka Nongbah Shillong ban pynitynnad shuh shuh ia ka Nan Polo. Naka liang ka tnat Tourism ka la mang T.18 klur ban shna ia ki jingtei ki ban pynbyrngia ia ki paidbah kynthup ka jingtei thymmai ia ki cafes bad ban pynitynnad ia ki Lights bad Sound (Sound Light Show) bad kiwei kiwei.

“Ngi la jam shakhmat bad ka jingpynphai biang ia ka Nan Polok, kaba bat mynta da ka tnat Forest & Environment. Ka Nan Polok kumba phi tip, wat ka jingkieng, kaba itynnad bad ba paw bha, ka dei kaba ju don bad ka Tnad Tourism hynrei namar ki katto katne ki daw, la shimti bad sumar da ka Tnad Forest” la ong u Bah Paul. U Bah Paul u la pynbna ruh ba ka por ban khang ia ka Nan Polok la pynjlan na ka 5 baje janmiet sha ka 10 baje mynmiet.

“Hadien ba ngi la dep shimti pura ia kane ka nam, ngin sa pynthikna nyngkong eh ban pynkylla ia ka por, ka por khang kan ym long shuh 5 baje janmiet, kan dei 10 baje mynmiet bad kan dei ruh ka jaka ban iai kai pynngad bad pynbyrngia ia ki nongwan shangkai sha Shillong, kiba ju ud ia ka jingbym don eiei ha Shillong ha ka por mynmiet” u la ong. “Kane kan iarap ruh ia ki Nongtrei Sorkar jong ngi, phi tip ba ki Ophis ki khang 5 baje janmiet bad ka nan ka khang 5 baje janmiet. Ki dei ban ioh ia ka por ban leit iaid kai bad kilan met ha kane ka jaka” u la bynrap.