Pyntreikam ka sorkar ia ka ATF ban sumar ei ia kiba dih drok

Ka Sorkar Jylla ka la rai ban pyntreikam da ka Addict Treatment Facility (ATF) ha Umsawli New Shillong Township, na ka bynta ban sumar bad ban ai jingiarap ia kiba kyrni dih drok kaba ym donkam ban siew pisa.  Iaka ATF yn pyntreikam ha ka jaka ba ju pyndonkam kum ka Covid Centre kaba don ha Umsawli ha kaba ka Sorkar ka la mang T. 50-70 lak. Ha kane ka ATF ki la don lypa ki nongtrei, ki Psychiatrist kiba la dep iaki jingshah hikai pyntbit, nongiasyllok bad kiba kyrni droks, ki jingthiah bad jaka sah bad ruh. Ia kane ka rai la shim ha ka jingialang jong ka Drug Reduction Elimination & Action Mission (DREAM) bala pyniaid da u Myntri ka tnat Social Welfare u Bah Paul Lyngdoh haka jingdon lang ka Director General of Police (DGP) Kong Idashisha Nongrang, u Mission Director ka GREAM u Bah Francis G Kharshiing, u SP ka Anti-Narcotics Task Force (ANTF), DHS, Medical Superintendent ka Shillong Civil Hospital.

Haba kren sha ki lad pathai khubor, u Bah Paul u la ong ba ka jingdon ki nongdih droks ha Jylla bala rah na ki surok bad na kylleng ki jaka ka nongbah kim don satia ia kino kino ki jaka ban ioh ia ki jingsumar, pynkhuid ia u droks bad ka jingiasyllok. “Khnang ban pynioh ia kine ki lad jingiarap baroh sha ki nongdih droks bala kyrni, ka jingialang ba mynta ka sngi kala rai ba ngin pyntyllun shakhmat kumba ngi la iakren ha ka jingialang ba khatduh jong ka DREAM project naka bynta ban pynkha ia kaei kaba ki khot ka Addict Treatment Facility (ATF)” la ong u Bah Paul. U Bah Paul u pyntip ba ha kine ki arsngi ban wan, ka kynhun ka ban ialam da u Mission Director ka DREAM kan sa leit ban jurip ia kane ka centre ha Umsawli khnang ban peit ia ki jingpynkhreh ha katei ka jaka.

Haba kylli, u Myntri ula pyntip ba ka pisa kala don lypa bad ka DREAM Mission na ka bynta ban buh ia kane ka jaka sumar. “Ngin pyntrei ia ki kam da ki bynta bynta hynrei ha ka bynta ba nyngkong, ka dei ban kot hapdeng T.50-T.70 lak”.Kat kum ka jingong jong u, ka pisa kala don mynta bad ka Tnad kaba la wan lyngba ka Ministry of Social Justice bad Empowerment bad ki don ruh ki bynta ba ioh na ka Tnad ka Koit ka Khiah ban iarap ai jingsumar ia ki nongdih droks khlem kano kano ka jingsiew.