Shah bat bun ki kali ba niah buaid, lum kuna jan T.3 lak ki pulit

Ki bor pulit ka Nongpoh Police Traffic Branch hynnin ka miet ki la pynlong biang ia ka jingpeitngor bad talasi ia ka iaid ka ieng ki nongñiah kali ki bym burom ia ki kyndon ain niah kali, kito kiba niah kali hadien ba la dih buaid ha kaba tang hapoh katto katne kynta ki pulit ki la ioh ban pynshitom da kaba daiñ kuna kaba la jan kot sha ka 3 lak tyngka. Ka jingiai bteng jong ki pulit ba dei peit ia ka jingiaid jingieng ki kali ha u surok bah National Highway 06, hadien ka jingiai lap ia ki jingbym bud thik ia ki kyndon ain niah kali, kaba la ju wanrah ruh shibun ki jingjia aksiden ha u ne u surok bah bad da ki phew ngut ki ju duh ei la ka jingim na ka jingniah khlem akor ia ki kali.

Na ka liang u Officer Incharge ka Nongpoh Police Traffic Branch, u Rubul Ali u la iathuh, ba ka tnat pulit kam banse ban treishitom ban ai jinghikai bad ban peitngor ia ka jingniah kali ha u surok bah na ka por sha ka por tang namar ka jingsngewkhia kaba jur ia ki jingjia aksiden kiba jia na ka por sha ka por tang namar ka jingbym burom ia ki kyndon ain jong ka Motor Vehicle Act bad ka jingniah khlem akor shaba palat da ki nongñiah kali. U la iathuh ruh, ba ha kane ka jingpeitngor mynta ka janmiet, la khmieh ia ki nongñiah kali kiba niah kali hapdeng ka jingdih buaid, ka jingbym biang ki kot ki sla, ka jingkit palat ka jingjrong ia ka kali lane ia ki kali kit siej kiba buh jingma ia kiwei pat ki kali kiba iaid nakhmat bad nadien katkum ka section 113 jong ka MVA, ha kaba la lap ruh shibun ki kali ki bym biang ia ki kot ki sla, la lap ruh ba don napdeng ki nongñiah kali kiba la dih buaid bad ka jingbym pyndonkam ia u seatbelt, ka jingbym pyndonkam ia ka helmet da ki nongñiah ia ki kali arshaka bad kito kiba shong nadien.

Shuh shuh ruh, u la iathuh, ba ha kane ka jingpeitngor ia ki nongñiah kali, ki pulit ki la pynshitom ia kito kiba pynkhein ain bad kiba niah hadien ba la buaid bad daiñ kuna ia ki, ha kaba baroh ka pisa ka la kot sha ka 2,99000 (Ar Lak 99 hajar tyngka. Na ka liang ki bor pulit ki la kyntu jur ia baroh ki nongñiah kali ba ki dei ban burom ia ki kyndon ain niah kali jong ka MVA bad ban burom ruh ia kiwei ban lait na ki jingjia ba sngewsih ha u surok bah, la bynrap ruh, ba na ka liang ki pulit ka traffic branch kin nang bteng ban peitngor ia ki rukom niah kali ha u ne u surok bah National Highway 06.