Ka Special Job Card ka hok kiba duna dkhot met : BDO Thadlaskein

U Block Development Officer jong ka Thadlaskein Block u Dr Heimonmi Niang ula pynshai shaphang ka Special Job card kaba long ka hok jong ki nongshong shnong hapoh ka ri kiba don ka jingduna ha ki dkhot met. Ha ka jingialang ba lyngkot ha ka ophis kaba la iadonlang ki briew ba don ka jingduna ha ki dkhot met ula ong, ba baroh ki nongshong shnong ba don jingduna ha ki dkhot met, ki don ka hok ban ioh ia ka job card ba kyrpang (special job card). Ka longiing ba don ia ki dkhot kiba kum kine nalor ka job card ba kawei pa kawei ka longiing ka dei ban ioh, kito kiba don ka jingduna ha ki dkhot met, ki dei ban ioh ia ka job card ba kyrpang.

U Dr Niang ula ong, kane ka dei ka hok jong ki bad u kyntu ia ki secretary VEC kumjuh ruh ki nongtrei jong ba block ba kim dei ban pynduh ia ka hok ba ki dei ban ioh. U la kyrpad ruh ia kine ki paralok ba don ka jingduna ha ka met kiba shong hapoh ka Thadlasein Block ba kin kynjoh ktien ia u lada ki don kano kano ka jingdonkam. Ka kong Ripnar Shylla ba long ka APO jong ka Thadalskein Block ka la pynshai ia kine ki nongshong shnong ba don jingduna ha ki dkhot met, ba ki dei ban iakynduh ia ki Secretary VEC jong ki bad ban pynbiang ia ki kot ki sla kum ka EPIC, ka Adhar, ka dur shiteng bad kiwei khnang ba yn lah ban pynioh ia ka job card ba ki dei ban ioh. Ka la ong ha kine ki sngi kiba la dep, na ka liang ka ophis jong u BDO Thadlaskein ki la lah ban aiti ia ki job card sha ki katto katne ki nongshong shnong jong ka block ba don ka jingduna ha bor iohi.

U Dr H.H. Mohrmen uba long u Secretary jong ka SURE ka seng treimon sngewbha ula pynpaw ka jingsngewnguh ia u BDO bad ka APO na ka bynta ka jingtrei shitom jong ki. La ioh ruh ia ka jingkren jong u Krishna Phawa na Mihmyntdu bad ka Heiioobitmi Tre Dhar na Wahiajer kiba don ka jingduna ha ka bor iohi.