Ha ka rakhe dap 500 snem, plie ophis thymmai ka Hima Nongkhlaw ha Patharkhmah

U MLA/MDC ka Jirang Constituency u bah Sosthenes Sohtun ha ka 8 tarik u Iaiong, 2025 ula ban plie ia ka ophis treikam ba thymmai jong ka Hima Nongkhlaw ia kaba la tip kum ka ‘Patharkhmah Branch’ kaba dei kawei na ki shnat treikam jong ka Hima Nongkhlaw.

Ia kane ka ophis treikam ba thymmai la tei ha ka shnong Patharkhmah mar syndah bad ka ophis barim bad la tei ha ka jinglut ba la lot sha ka 8 lak tyngka ia kaba la pynioh da u MLA ka Jirang u bah Sosthenes Sohtun lyngba ka ‘Chief Minister’s Special Development Fund’ jong u snem 2023-2024.

Haba kren ha kane ka sngi u bah Sohtun ula ai khublei kyrpang ia u chief minister jong ka jylla u Conrad K Sangma uba la pynioh ia kane ka scheme na ka bynta ka Hima Nongkhlaw bad ruh ia ki jingiarap kiba ula pynioh ia ka Jirang constituency. U bah Sohtun ula ai khublei kitbok bad kyrkhu kyrdoh ruh ia ka Hima Nongkhlaw ba kan nangkiew irat ha baroh ki liang khamtam ha kane ka snem ba ka Hima Nongkhlaw ka rakhe ia ka jongdap 500 snem.

Kiwei pat ba la iadonlang ha kane ka sngi ki kynthup ia u syiem ka Hima Nongkhlaw u Pa’im PM Syiemlieh, u syiem ka Hima Jirang u Pa’im RH. Wahlang, ki myntri ka Hima Nongkhlaw, ki nongialam shnong ka Patharkhmah bad na ki shnong ba marjan nalor kiwei kiba la shah khot sngewbha bad la ioh ruh ban pynher ia ka lama jong ka Hima Nongkhlaw kum ka dak jong ka jingbteng ia ka jingrakhe ia ka jingdap 500 snem ka Hima.