Kyntait u Myntri Lahkmen Rymbui ia ka jingkynnoh ba pyntroi ka sorkar ia ka tnad pule

U Myntri ka tnad Pule Puthi Bah Lahkmen Rymbui ula kyntait ia ka jingkam ba ka sorkar ka la pyntroin ia ka kam pule dangle, haba ban jur ba ki jingpynkylla ba dang iaid mynta ki dei kiba thmu ban pynbeit ryntih ia ka rukom treikam baroh bad ban pynbha ia ki skul bad college.

Ula kynthoh ia kane halor ki jingkam jong ka kynhun ba ialam da u MLA ka VPP bah Brightstarwell Marbaniang halor ka jinglong jingman ka jingai jingshakri bad ka jingsiew ia ki deficit grant-in-aid college.

Haba kren sha ki lad pathai khubor u Bah Lahkmen ula ong ba ka kynhun ka la pynsngew ia ka jingsheptieng ba ka Sorkar ka “pyrshang ban pyntroin ia ka kam pule dangle da kaba pynduh noh ia ki kyndon ka UGC”.

“Nga la batai ba ka Sorkar ha ka jingshisha, ka pyrshang ban pynbeit ryntih ia ka pule dangle baroh kawei, la ka dei ha ki skul lane ki college” ong u Bah Lahkmen. “Ngi la iaid ha ka lynti ha kaba ka jingthmu ka long ban tei ia ka rukom pyniaid ba biang eh ha ka pule puthi na bynta ka Jylla”.

U Bah Lahkmen ula iathuh ba ka Sorkar kan sa shong bishar bha ia kane ka kam. “Katto katne ngut ki nonghikai ki la iakynduh ia nga bad nga la ong ha ki ba ngin sa bishar bha ia ka kam bad ban leh ia kaba bha tam ia ka kam pule dangle ha Jylla” ula ong.

Halor ki jingujor ba katto katne ki college ki khlem pynmih jingpynbna ia ki kam nonghikai, u Myntri ula ong ba ka jingpyniaid ia ki college kam dei ka jingkitkhlieh jong ka Sorkar. “Ki college kim dei kiba pyniaid tang da ka sorkar, ki dei kiba pyniaid da ki society lane ki governing body. Ki dei ban khmih ia la ki jong ki rukom pyniaid kam” ula ong.

“Ngi lah ban tuklar lada don ka jingbym biang ha ka jingai ia ki jinghikai. Lym kumta ka Jylla kam ju tuklar ia ki rukom treikam ki kolej ” ula ong.

U Bah Lahkmen ula pynshai ba ia ki kyndon ka UGC la pyntreikam na bynta ka jingthungkam thymmai. “Baroh ki nonghikai ha ki college ki hap ban pynbiang ia ki kyndon ka UGC” ula ong. “Ia ki kyrtong ki dei ha ka kyrdan post graduate degree da 50% marks ka la biang eh ban thungkam bad ki lah ban ioh ia kiwei ki jingmyntoi ba ai ka UGC kiba la pyntreikam da ka Jylla” ula bynrap.