Ka Khasi Students’ Union (KSU), Umsning Circle ha ka jingiakynduh ia u MLA ka 11-Umsning Constituency u Dr. Celestine Lyngdoh ka la pynsngew halor ka mat kaba kongsan shaphang ka jingduna jong ki Doctor ha Community Health Centre (CHC), Umsning.
Ha kane ka jingïakynduh, ka Seng hapoh ka jingialam u President u Samla Lester Nongbet bad kiwei ki nongkitkam, ki la pynpaw ia ka jingsngewkhia halor ki jingeh ba ki paidbah nongshong shnong ka thaiñ Umsning ki mad man ka por namar ka jingduna jong ki Doctor ha katei ka jaka sumar.
“Kane ka jingduna ka la ktah jur ia ka rukom ai jingsumar, kaba la pynlong ia bun ki nongpang ban mad ia ki jingeh haba ki leit wad jingsumar bad shim dawai. Ym tang katta, hynrei don ruh ki jingjia kiba sngewsih kiba la mih na ka bynta kane ka jingbym biang ka rukom treikam jong ka CHC,” ong u samla Nongbet.
Ha kajuh ka por, ka Seng ka la pyntip ruh ia u MLA ba mynshwa ka la dep ban iakren bad ki bor ba dei peit ia kane ka jaka sumar halor kine ki jingeh, hynrei haduh mynta ym pat shym la don kano kano ka jingpynbeit kaba biang.
Na ka liang jong u MLA, u la batai ba katto katne ki Doctor ki dang shim shuti ban bteng ia ka jingpule jong ki bad bynrap ruh ba ka jylla hi baroh kawei ka dang mad ia ka jingduna ki Doctor kaba la ktah ia ka jingtreikam ha bun ki jaka ai jingsumar.
Ka seng ka la pynpaw ba kam shym la hun ia ka jubab na u MLA bad ka la ban jur ba ka Sorkar bad ka tnad ka Koit ka Khiah ki dei ban shimkhia bad wad da ki lad ki lynti ban pyndap noh ia ki jaka ba lait khnang ba ka CHC Umsning kan lah ban ai jingshakri kaba paka, kaba iaid beit bad kaba ai jingmyntoi ia ki paidbah.
Katkum ka jingong u President ka seng, u MLA u la kular ha ka Seng ba un sa iakren bad tuklar ia kane ka kam bad u Myntri ba dei khmih khnang ba yn lah ban pynsted ia ka jingthep Doctor ha CHC Umsning bad ban pynthikna ba ka jingshakri paidbah kan nang iai long kaba iaid beit, kaba iaid ryntih bad kaba lah ban pynbiang ia ka jingdonkam jong ki paidbah ka thaiñ Umsning bad ka them Ri Bhoi hi baroh kawei.
You may also like
-
Lah ban ktah ka jingdon um bad ka rep ba duna ka jinghap slap ha Meghalaya
-
Pynlong ka Synjuk ki Rangbah Kur ka Bri u Hynniewtrep da ka Movement ban khanglad tuh jait ki bar jylla bad ai jaid kpa
-
Ka jingkynnoh ia ka Meghalaya ka daw ka jingshlei um ha Assam kam don nongrim: Prestone
-
Iaid beit ka ‘Public Hearing’ ka Shree Cement, siat ‘Tear Gas’ ki pulit ia ki paidbah, julor ki kali kynthup ka Ambulance ba shah kawang maw
-
“Ka Wangala Festival ba 1000 Drum ban ioh Guinness World Record”