Phah jingthoh sha u Myntri sorkar pdeng ban thaw ‘High Level Inquary’ ban tohkit

:U nongtreimon sngewbha u Greneth M Sangma ula phah jingthoh ha u Myntri sorkar pdeng ba peit ia ka tnad ka kit ka bah bad surok u Nitin Gadkari ban thaw ia ka ‘High Level Inquary’ ban tohkit halor ka jingshna ia ka surok Tura- Dalu bad ka surokbah Shillong- Baghmara, East Garo Hills.

Ha ka dorkhas ba la phah sha u Myntri sorkar pdeng, ula kyntu ban tuklar lem halor ka jingshna torti ia ki surok kaba la buh jingeh ia ki paidbah ka thain rilum Garo bad ula kynnoh ki bor ophis ba dei peit ki la iathuh ba ki pyndep ia ki jingtrei hynrei kine ki surok hadien khyndiat por ki sniew bad phra, ka jingkam ba la dep ia ki jingtrei ka paw ba ki thok katba ka kam kim pyndep katkum ka rukom ba dei ban leh.

“Ka jingpynheh ia ka surok na Tura sha Dalu, naduh 85 haduh 145 km ka National Highway Infastructure Development Corporation Limited (NHIDCL) ka la kam ba la pyndep ia katei ka project, hynrei ki nongshong shnong ki iohi bad sakhi ba bun ki bynta ym pat pyndep” ula bynrap.

U Sangma ula pynpaw ki paidbah ka South Garo Hills ki pyrshah ia ka jingkynriah ia ka project National Highway kaba pyniasoh ia ka Dudhnoi na Assam sha Dalu lyngba ka Baghmara na State Highway Divsiion sha ka NHIDCL bad kumjuh ia ka jingshna pynheh ia ka surok Dainadubi-Darugiri ba 30 km kaba la mang pisa T.951.27 klur ka la pynduh jingshaniah ia ki paidbah ia ka rukom treikam ka jong kompani NHIDCL hapoh ka jylla.