Halor ki kam pynroi iasoh NPP ki nongkyrshan UDP, HSPDP ha Mawkyrwat

Ka National Peoples Party (NPP) hynne ka sngi ka la pdiang burom ia ka jingwan pyniasoh ki nongialam bad ki nongkyrshan ba radbah jong ka United Democratic Party (UDP) bad jong ka HSPDP jong ka Mawkyrwat Block. Ia kine ki nongialam bad ki nongkyrshan la pdiang burom hynne ka sngi ha ka jingialang ba long ha madan ka Nativity school, Mawkyrwat. Haba kren ha ka sngi, u nongialam ka UDP na Mawkyrwat u bah SK Budnah ula ong ba shwa ban kin leit pyniasoh sha ka party NPP, ki la iamir bad iakren lang da ka jingiamynjur lang baroh ki  nongkyrshan na ka party UDP. U la ong ruh ba ha South West Khasi Hills District ka dang donkam ia shibun ki kam pynroi khamtam ka surok bad kiwei de.

“Ngi iohi ia ki rukom trei kam jong ka Party NPP kaba la khmat iaka Sorkar jylla lyngba u myntri rangbah ka jylla u Conrad K.Sangma bad kiwei de ki nongialam ka party NPP kila pynurlong ia shibun ki kam pynroi hapoh ka jylla namar kata ngi don jingkyrmen ba ki jingdonkam kiba kongsan hapoh ka South West Khasi Hills District khamtam iaka surok na Weiloi sha duh sha Ranthong,  kan urlong noh kumba ki paidbah ka distrik ngi ju ud ju nam ban ioh noh daka Surok kaba bha bad ki wei de ki kam pynroi hapoh ka Distrik baroh kawei, la ong bah SK Budnah.

Katba u bah Polanding Sohphoh uba dei na ka party HSPDP u ba dei uba la iakhun ia ka ilekshon  MDC ha kine snem ba la dep na ka Mawkyrwat Konstitwensi, ula ong ba ka daw kaba pynlong ia u ban leit rung noh ha ka party NPP ka dei hi kajuh ka phang na ka bynta ka roi ka par ha ka district kumjuh ka jingitynnad ia ki nongialam ka party NPP ba la lam khmat da u Conrad K.Sangma. Ha kane ka sngi ki paidbah nongkyrshan na kylleng ka jaka jong ka thain, ki la ia poi khrui ha kane ka madan ban wan sakhi ia kane ka jingpyniasoh jong kine ki nongialam ka UDP bad HSPDP.