Plie ar tylli ki surok ha Rilbong, ka Polisi thymmai, ong u Bah Sanbor

U Myntri ka Sorkar uba long ruh u MLA ka South Shillong constituency, u Bah Sanbor Shullai hynin ka sngi Saitjain ula plie 2 tylli ki surok ba thymmai ha ka thaiñ Rilbong, ba la shna ha ka jinglut ba T.6.33 klur tam. U Bah Sanbor ula plie nyngkong ia ka surok ba la shna najan ka khyrdop ka Meghalaya Legislative Assembly, Ribong ban pyniasoh bad kawei pat ka surok hajan ka Community Rilbong kaba jrong 385 mitar ha ka jinglut ba T.1.98 Klur bad hadien kane ula plie sa ka surok na Rilbong ban mih sha surok PWD ban pyniasoh bad ka jingkieng Umshyrpi kaba jrong 161 mitar ha ka jinglut ba T.4.35 Klur tam.

Ha kane ka sngi la donlang u Executive Engineer ka PWD Roads u Bah S Lytep, u Assistant Engineer u Bah H Pakyntein ki heh pulit ka district, ki nongialam shnong bad ki paid nongshong shnong ka thaiñ. Haba ai jingkren u Bah Sanbor ula pynpaw ka jingkmen ba la lah ban pynurlong ia kine ki ar tylli ki surok bad ula ong ba u ieng skhem ha ka polisi treikam jong u ban trei ia ki kam bad duna ka ktien.    “Ha kine ki 8 snem ba la dep, nga la shim ia ka polisi ba thymmai ban shakri ia ki paidbah. Ka polisi thymmai ka long ban pyni ki kam kham bun bad duna ka ktien. Nga kren duna, hynrei nga trei kham bun phi tip kham bha kumno nga shakri bad iarap ia phi bad nga tip kham bha ruh kumno phi iarap bad kyrshan ia nga” la ong u Bah Sanbor.

U la pynpaw ka jingsngewnguh ia ki trai jaka ba la noh synniang ki jaka khlem da shim ka bai lutksan bad ia u Executive Engineer ka PWD bad ka kynhun jong u na ka bynta ka jingtrei shitom jong ki” ong u Bah Sanbor.U la pynpaw ka jingsngewnguh ïa ki Dorbar Shnong, ki kynhun bad ki seng treimon sngewbha bad ia ki paidbah ka Rilbong, Kench’s Trace, Oxford, bad Greater Laban kiba la ai ka jingïatreilang ban pynurlong ia kine ar tylli ki surok ba kongsan ban suk ka leit ka wan ki paidbah. Nalor kane, ula ai khublei ruh ia u Myntri iada ri ka Sorkar Pdeng u Rajnath Singh, uba la ai ia ka No Objection Certificate (NOC) na ka bynta ban lah ban pynurlong ia katei ka projek.