Plie u Dy CM ia ka ‘Portal’ ban iarap ia ki paidbah ban ujor ‘Online’

U Symbud Myntri Rangbah ka Jylla u Bah Prestone Tynsong hynne ka sngi, u la plie paitbah ia ka ‘Portal’ jong ka East Khasi Hills District kaba la tip kum ka dc-ekh.in ha ka jingialang kaba la long ha Conference Hall ha ophis DC, Shillong.

Haba kren ha kane ka jingialang, u Bah Prestone ula ong, ba ka jingplie ia kane ka Portal kan plie lad ia ki paitbah ba kin phah ia ki jingujor da kaba shu leh ‘Online’ bad kane ka sien jam ka la sdang mynta na East Khasi Hills bad yn sa pyniar ka jingshakri ha kylleng ki district ka jylla Meghalaya.

U Symbud Myntri Rangbah ula ong ba ka jingthmu jong ka sorkar ka long ban pynthikna ba man la ki nongshong shnong, la kidei kiba sah ha kano kano ka jaka ruh kin lah ban ioh ia ki lad ai jingshakri jong ka sorkar bad ban phah shimkhia ia ka jingeh kaba ki mad khlem da donkam shuh ban leit hi dalade ban ujor hynrei ban shu ujor ia ki jingeh kaba ki mad da kaba shu leh online.

Ula ong, ba ka jingthmu jong ka Portal ka long ban pynlong ia ki bor pyniaid ka district ba kin treikam bha bad ba lah ban ai ka jingshakri ia ki paidbah bad ka jingthmu jong ka sorkar ka long kaba shai ban ialeh ban shimkhia ia ka jingeh kaba mad da ki nongshong shnong bad ban don ia ka jingiadei kaba iajan hapdeng ka jingai jingshakri ka sorkar bad ki paid nongshong shnong.