Kynduh ka HYC ia u Lat, kyntu ban buh ophis NCB ha Meghalaya

Ka Hynniewtrep Youth Council ka la pynpaw ka jingsngewkhia halor ka jingioh laitlan jong ki briew ban leit thied drok kumba leit thied jingthied ki riew paidbah na ki dukan bad na madan.Ka seng hynne ka sngi ka la leit rah ia kane ka mat ha u Lat ka jylla ban kyntu ia u ba un iakren bad ka tnad Kam Pohiing ka sorkar pdeng na bynta ka jingdonkam kyrkieh ban buh ia ka Zonal Office jong ka Narcotics Control Bereau (NCB) ha jylla Meghalaya.U President ka HYC haba kren sha ki lad pathai khubor ula ong ba ka Meghalaya ka dei ka jylla kaba jyllei ki kam khaii bad iadih drok bad kawei na ki daw ba pyllong ia ki samla ba kin ngop, ka dei namar ka jingsuk palat ban pynpoi ia u dork ha kane ka jylla lyngba ka jingjan ka jylla ia ka Golden Triangle, ka jingdon ia ki surok National Highway (NH) kiba iasoh bad kiwei ki jylla.

U bah Roy ula ong ba lada kane ka ophis ka don ha Shillong kan lah ban tehlakam bad kan lah ban iatreilang bad ki tnad pulit, ka tnad Custom, bad kiwei ki tnad treikam kiban peit ban khanglad ia ka jingrung suk jong u drok ha ka jylla.“Jin lada kam don ka jingpoi suk u drok, ki samla kiba ngop ha u drok kin ym ioh ban thied. Ka jingdon ka ophis NCB kan khanglad bad ban iada na ka jinglaitlan bad ka jingwan u drok ha ka jylla,” ong u bah Roy.Ha kajuh ka por ka seng ha ka jingiakynduh ia u Lat ka la pynsngew ruh haba iadei bad ka jingsah beain ki briew ha Lum Survey, Iewduh, Shillong.

U bah Roy ula ong ba ki briew kiba shong ha Lum Survey kidei kiba  shong beain khlem da ioh jingbit. Ula ong ba ka seng ka la kyntu ia u Lat ka jylla ba un shimkhia halor kane ban iakren bad ka tnad Ministry of Defence bad ka tnad Kam Pohiing ka sorkar pdeng ban pyntikna ba kine ki briew kiba shong beain ha katei ka jaka dei ban weng noh kloi, khnang ban khanglad ia kino kino ki kam sniew kiba mih na katei ka jaka.