Shah pynngat mukotduma thymmai ki nongialam KSU

Ki Pulit ka jylla hynne ka sngi ki la ialam ia Lai ngut ki nongialam ka Khasi Students’ Union (KSU) sha Civil Hospital Shillong ban leh ia ka Medical Check Up.

Ia kine ki lai ngut ki nongialam ki kynthup u President u samla Raymond Kharjana, u General secretary samla Reuben Najiar bad u Vice-president u samla Pynkmenlang Sanmiet, la ialam ban leh ia ka Medical check-up ha shwa ban rah tian bishar biang sha Iing Kashari bad kit biang sha phatok.

U samla Kharjana haba kren hynne ka sngi, ula ong ba wat la ki bor sorkar ki la kem ia ki nongialam bad dkhot ka seng, hynrei kin ym lah ban set along ban khanglad ia ki mat jingdawa ka seng.

Ha kajuh ka por, na ka liang u nongialam barim ka KSU u bah Lambokstar Marngar uba la synran lang ia ki nongialam ka seng ula ong ba ka jingwanrah biang ia ki nongialam sha iing kashari ka dei namar ka jingshah thep mukotduma thymmai biang ia ki.

U bah Lambokstar ula ong, watla lada la pynngat bun kyndon ia ki, ka jingdawa ka seng kan ym tlot bad ka KSU kan ieng skhem beit halor ki nongrim ki mat jingdawa ba la pynpaw da ka seng.

“Rynjain lehse ki lah ban kit ia ki mukotduma kiba ka sorkar ka tynnian ia ki, hynrei kin ym lah ban pynkbum ia ka nongrim jong ki lai ngut ki nongialam. Kata hi ka dei ka kyrwoh ba kine ki nongialam ki ai, ‘Ngi lah ban shong, ki lah ban sei bad pharep ia ngi da kumne kumtai hynrei ki mat ka jaidbynriew ngin iaid shakhmat,” ong u bah Lambokstar.

Ula ong la kumba 70 percent ki mat ba la iakren hapdeng ka KSU bad ka sorkar, ki la long kiba la seisoh bad ki don sa katto katne kiba sahteng ban pyntreikam.

Ula ban jur ba ka donkam ba ki nongialam ka seng kin mih sha madan ban iatai iathir kham bha namar ka don ka mat ba kongsan ba ia dei bad ka NEIGRIHMS.

“Ka long kaba donkam ba ki lai ngut ki nongialam ban mih sha madan ban iatai iathir khambha namar ba ka don ka ishu ba ia dei bad ka NEIGHRIMS, ki nongialam ba ha khmat ki donkam ban mih iakren ban buddien namar ki don shibun ki ban pyndep,” ula ong.

 U bah Lambokstar ula ong ba kim shym la dawa ban pyllait ia ki nongialam hynrei ka nongrim ka seng ka long halor ki mat jingdawa.

Ka KSU ka khmih lynti ba shen kan iakynduh ban iashong pyrkhat na bynta ki sienjam ba kan shim.