Talasi ka HNYF ia ki kali kit dohkha ba wan nabar

Ban Tehlakam ïa ka jingwan ruh ki dohkha na bar ka jylla khlem da iaid ryntih katkum ki kyndon Aiñ, mynta ka sngi ki nongialam ka Hynniewtrep National Youth Front (HNYF), Northern Region mynta ka sngi ki la ia mih ryntih ban talasi ia ki Kali kit dohkha ba wan na bar bad ban khaïi shapoh ka jylla khlem da pynbiang ia ki kot ki sla lane khlem ka trading Licence.

Ïa katei ka jing talasi iaki Kali kit dohkha la pynlong daki Nongialam ka Seng HNYF ha Bynrihat bad ha kane ka jingtalasi ïaki Kali kiba kit dohkha im na Jylla Assam shapoh Meghalaya la ioh ban bat da ki phew tylli ki Kali ki ba thmu ban wan shalan iaki dohkha im shapoh ka jylla Meghalaya khlem da pynbiang iaki kot ki sla bad khamtam ka Trading Licence.

Ha kane ka jingkhynra, ki Nongialam ka Seng HNYF ki la lap ruh ba baroh ki Kali ki ba la bat ym shem la don uwei ruh u khasi u ban long trai iaki Kali hynrei ki dei hi kiba la pynïaid daki bar jylla khlem ki kot ki sla kiba biang bad kitei ki bar jylla ki la shu pyndonkam daki kyrteng Khasi tang ban ioh rung shapoh ka jylla bad ban ioh khaïi suk iaki.

Kitei ki Nongialam ka Seng ki la buh daka jingmaham kaba jur ïa baroh ki bar jylla kiba thmu ban shalan iaki dohkha im shapoh ka jylla ba ki dei ban pynbiang ia baroh ki kot ki sla kiba donkam, ha kajuh kapor ki la dawa ruh naka KHADC ba ka dei ban shim khia ia kane ka jingshim kabu ki briew kiba nabar namar kane ka jingwan ban khaïi dohkha im daki bar jylla khlem ki kot ki sla kiba biang ka ktah pat iaki briew jong ka jylla Meghalaya.