Wer ka GMT ïa ki paidbah ban pynkhuid ia ki wah ha sor Nongstoiñ

Ka Great Mountain Trust, ka seng trei mon sngewbha kaba trei na ka bynta ban pynneh pynsah ïa ka mariang bad ki jingdon jingem ka Mei mariang, ka la pynlong ïa ka prokram ai jinghikai halor ka jingkhuid bad ka jingïada ïa ka mariang, da kaba pynleit jingmut kyrpang ïa ka jingkhuid ïa ki wah bad ki dohum dohwah. U Bah Gabriel Wahlang, MLA ka Nongstoiñ, u la long u Kongsan ha katei ka sngi, katba ka Kong N.E. Wanñiang MCS, Assistant Commissioner, West Khasi Hills District, ka la long ka Symbud Kongsan.

Ki ophisar na ka tnat Soil and Water Conservation, ki ophisar na ki tnat sorkar bapher bapher, ki nongsynshar shnong, ki khynnah skul bad kiwei kiwei ki la wan ban shim bynta. Ha katei ka jingïalang la pynlong ïa ka jingïatai bniah halor ki lad ki lynti ban sumar ïa ka mariang bad ban ïakhun pyrshah ïa ka jingpynjaboh, khamtam ïa ki ar tylli ki wah kiba tuid lyngba ka sor Nongstoiñ, kata ka Wah Nonbah bad ka Wah Nondeiñ. U Bah R.K. Bijay Byrsat, Shongknor bad Nongseng jong ka Great Mountain Trust, u la ong ba ka seng ka la trei shitom ban wad ïa ki lad ki lynti ban pynkhuid bad pynneh ïa kitei ki wah. U la pyntip ruh ba ka seng ka la dep ban leh ïa ka jingtest ïa ka um ha ki laboratory ban lap ïa ka jinglong jong ka um bad ka jingjaboh jong ki wah.

Ka jingthmu jong katei ka prokram ka long ban pynmih jingmut paidbah bad kyntu ïa baroh ban ïatreilang ha kaban pynneh ïa ka jingkhuid bad jingïada ïa ki jingdon jingem mariang. La pynlong ïa katei ka prokram ha Phresilla Byrsat Complex, New Nongstoiñ.