Yn pynmih ka sorkar ia ka kor iarap ne ka Guidbook na bynta ki nonghikai naduh klas 1-X

U Commissioner & Secretary ka tnad pule puthi u Vijay Kumar Mantri hynne ka sngi u la pyntip ba ka sorkar ka la pynkhreh ban pynmih iaka kot iarap ne ka Guidebook na bynta ki nonghikai skul khnang ba kin lah ban ai ka jinghikai kaba biang sha ki khynnah pule. U Vijay Mantri ula ong ba kane ka kot iarap ka sorkar jylla kan sa pyllait na bynta ki nonghikai naduh ka kyrdan pule Klas I haduh Klas X, khnang ban kyntiew ia ka rukom ai jinghikai, kaba dei ruh shi bynta jong ka sienjam jong ka CM IMPACT jong ka sorkar jylla.

“Ngi lah buh ia ka thong ha ka rukom ai jinghikai khnang ba ki nonghikai kin lah ban pynsngewthuh ia ki khynnah, kumno ban pynsuk ia ka sobjek bad ban hikai ia ki khynnah pule,” la ong u Vijay Mantri. Ha kajuh ka por u Mantri ula pyntip ba ka tnad pule puthi, dang shen kala pynlong ia ka prokram kaba shi bnai kaba la tip kum ka Meghalaya Class Readiness Programme (MCRP) hapoh jong ka CM IMPACT. “Kane ka prokram ka long ban weng ia ka jingduna hapdeng jong ka Klas IX bad X bad ban wanrah lang ia baroh ki khynnah pule ha kawei ka kyrdan, khnang ba kin sngewthuh ia kaei kaba ki nonghikai ki ai jinghikai,” ula ong.

Nalor kane, ula pyntip ba ka sorkar kan sa pynmih ia ka Meghalaya Learning Enhancement Programme ban iarap ia ki nonghikai ban kiew ha ka rukom ai jinghikai ka jongki lyngba ki jingai jinghikai ha kaba iadei bad ka kam hikai skul.