Jurip u MLA ïa ka surok PMGSY na Siejiong sha Ryngksaw

Hadien ba ki paidbah ki la ud halor ka jingslem ban shna pyndep ia ka surok, ki la mynjur bad ki la sngewhun hadien ba u MLA, ki Asst engineer ka PWD kiba peit ia ka PMGSY bad u kontraktor, ki lah leit bab pynshai lang ha kaba iadei bad ka jingshna ia ka surok kaba wan na MRL 25 Siejiong sha Ryngksaw ha ka jingjngai kaba 3 km.

Ha kane ka sngi, la ia don lang u MLA ka thaiñ, u bah Heaving Stone Kharpran uba la wan ban sakhi lang ia ka jingpynshai, u Rangbah Shnong, bah Edmund Mylliemgap, Secretary Shnkng, bah James nongkynrih, bah Kyntu Pyrbot, Asst. Engineer PWD, bah Lovingwell Kharpran uba dei u contractor ryngkat ki paidbah.

U Asst. Engineer haba pynshai sha ki paidbah, u la iathuh ba ia ka proposal la dep ban ai naduh u snem 2022-23 kaba wan naduh Delhi bad kane ka surok ka wan ha u snem 2024-25.

U la iathuh ba ia kane ka Pradhan Mantri Gram Sadak Yojana (PMGSY) scheme la phah ban pyndep hapoh 1 snem, hynrei na Delhi, ki la pynkylla noh ia ka rukom shna na u maw metal bad ka rong sha ka Cement Treated Base (CTB) kaba dei ka rukom pyntrei da ka rong ha kum kane ka juk ba mynta bad hap pynkylla ruh wat ia ka estimate.

U la iathuh ba ka daw ruh kadei namar hap trei tang 6 bnai namar ka jingpynthud ka bor mariang bad ynda la kut ka por slap, la lah ban pyndep noh ia ka surok, bad la ioh ban pan jingbit na Delhi ban bteng sa 6 bnai haduh bakut jong u snem 2026.

U MLA u la iathuh ba hadien ka jingud jingman na ki nongshong shnong namar ka jingslem pyntrei ia ka surok, hynrei u la hun hadien ba la ioh ia ka jingpynshai na u engineer uba pyntrei ia kane ka surok.

U la ong ba ka daw ba slem ruh kadei namar ka estimate kaba hap pynkylla namar ki bor bahalor na Delhi, ki kwah ban leh da ka CTB kaba wanrah ia ka jingkhuid bad kabym ktah ia ka mariang.

U la iathuh ba kumba ong u Asst. Engineer, donkam ban long kiba iaishah bad lada ailad ka mariang, yn lah ban pyndep noh ha u bnai May, bad lada ym ailad ka mariang, yn pyndep noh hapoh u bnai December.

Kane ka surok kaba 3 km sha ka shnong Ryngksaw, ka la ioh ia ka scheme lyngba ka PMGSY ha ka jinglut kaba 335.376 lak, kaba la khein lang ia ka construction cost kaba 300.65 lak bad ka maintenance cost kaba 34.73 lak na ka bynta 5 snem.