Peit shwa ka jingiapait hapoh ka seng Congress, Kynthoh u Conrad ia u Pala

U Myntri Rangbah ka Jylla u Conrad K Sangma hynne ka Sngi Balang ula ong, ba kam don ka jingiapait hapoh ka seng NPP halor ka ilekshon MP Rajya Sabha, kumba la pynpaw u President ka Congress u Bah Vincent H Pala bad kynthoh kylla ia u Bah Pala ba u dei ban peit shwa ka jingiapait iapra hapoh ka Congress.

Haba iakren bad ki nongthoh khubor, u National President ka NPP u Conrad Sangma ula ong, ka NPP kam shym treikam lyngba ka hukum kiba don kyrdan ba halor eh, hynrei ka NPP ka treikam da ka lynti synshar paitbah bad ka sngap ia ka sur kiba bun balang.

“Kam don la jingleh donbor ia kano kano ka ri da ki nongialam ba halor, ka ju don beit ki jingjia halor ki mat treikam hynrei ka rukom ka dei na bynta ka bha ban shim ia kano kano ka rai ba khatduh” la ong u Conrad.

Ula bynrap baroh kin kren ia kaei ba ki kwah, watla ka dei kaba nga ngam lah ban pdiang. Kane ka rukom treikam ha ka synshar paidbah bad ka dei ka nongrim ba ka seng ban shakri ia ki paidbah.

Halor ki jingkynthoh u Bah Vincent Pala u Conrad ula ong, “u Bah Pala um donkam ban khuslai ia ka jingorpait ka seng NPP, hynrei u dei ban peit kham bun eh ia ka jingiapait hapoh ka seng Congress”.

Halor ka ilekshon MP Rajya Sabha u Conrad ula ong, ka seng kan iasyllok bad shong pyrkhat ban shim rai halor ka ilekshon Rajya Sabha, bad kan sngap ia ka sur kiba bun balang bad ki MLA kum ki nongthep vote.