Buh Mawnongrim u Myntri sorkar ban tei ophis Elaka Nongpoh ba T.16 lak

Ka jingphoh sniew bad ka jingangnud ba la slem ki bor pyniaid ka Elaka Nongpoh Sirdarship ka la jan urlong ha kaba mynta ka sngi la buh mawnongrim ban tei ia ka ophis treikam ba pura hajan ka Laybye Market ha Nongpoh.

Nalor ka jingbuh mawnongrim la pyllait noh ia ka blue print lane ka shap ban tei ia ka ophis building ba 3 mala ia kaba la plie da u Bah Sosthenes Sohtun, Myntri ka sorkar jylla ha ka jingiadonlang u Bah Mayral Born Syiem, MLA ka Nongpoh, u Dr. Celestine Lyngdoh, MLA ka Umsning, u Acting Sirdar ka Elaka Nongpoh Sirdarship u Bah Luistar Lyngdoh, ki Lyngdoh Raid bad ki Rangbah Shnong na ki Shnong bapher bapher.

Haba kren ha kane ka sngi kum u kongsan, u Bah Sosthenes Sohtun u la pynpaw ia ka jingkmen kaba khraw ban ia don bynta lang ha kane ka sngi sah jingkynmaw jong ki nongialam ka Elaka Nongpoh Sirdarship, ha kaba shen ha ki snem kiban sa wan kin sa ioh noh ia la ka ophis treikam kaba pura kaban pynsuk ia ki kum ki nongialam ban pyntyllun ia ki kam synshar Elaka bad ki Raid bapher bapher.

U la ong ruh, ba kam long kaba suk ia ki nongialam ban shakri ne pyntyllun ia ki kam synshar khaddar haba kim don ia ka jaka shong treikam ne ban pyrkhat kam kumta lyngba ka jinglah ban tei ia ka ophis kaba pura kan long shisha ka jingkyrkhu ymtang ia ki nongialam ka Elaka Nongpoh Sirdarship ne ki Raid bapher bapher hynrei wat ia ki khun ki hajar ba kin lah ban ioh jingmyntoi lyngba kane ka ophis.

Ha kane ka sngi, la pynbna ruh ia ki song jingiarap ban tei ia kane ka ophis building ha kaba na ka liang u Bah Sosthenes Sohtun u la kular ban ai jingiarap kumba 8 lak tyngka, u Bah Mayralborn Syiem 5 lak tyngka bad na ka liang u Dr. Celestine Lyngdoh 3 lak tyngka.