“Ki MLA bad MDC ki dei ban ialap ban jop ka Party UDP”

U Kyrtong ka UDP u bah Vivanstone G. Kharngapkynta ula ong ba kum u nongiasaid ain udei uwei uba tbit bha ban iasaid ia ki Mukotduma ha iing kashari bad ula pynpaw ka jingkmen ba ka UDP ka la sei ia u kum u kyrtong MP shiteng samoi sha Lok Sabha ban long u nongiasaid ia ka ri bad ka jaidbynriew ha ka iing dorbar Thawain ka ri.
Haba kren ha ka jingialang pdiang burom ia u kum u kyrtong hynne ka sngi ha ophis treikam ka UDP, u bah Kynta ula pynpaw ka jingkhmih lynti ba ka party UDP kan long kaba jop bad kan ioh ia ka lad ban synshar ha u snem 2028.
“Ha Iing kashari nga long uba tbit bha ban iasaid Mukotduma bad kiba ngat pyrshah ban iakhun bad nga, ki shait iam bad nga ju sngew synei ia ki. Haba nga bam ka Mluh jongno jongno, phin ym shem ba ngan leh lyndet. Ngam dei u briew ba bam ar maloi,” ong u bah Kynta.
U bah Kynta ula ong ba ha ka por ba u long u nongiasaid ain ha District Council la bun snem ruh, ki la bun ki seng sain pyrthei kiba ialam ia ka EC, hynrei kim shym la peit shilliang khmat ia u namar ba ki tip ba u dei u briew uba beit.
La 38-40 snem ula dei u nongiasaid ain bad ula jan poi ka por ba un shongthait noh. Hynrei kane ka jingiakhun ia ka MP, ka dei ka jingplie lad jong u Blei ba un iasaid na bynta ka ri bad ka jaidbynriew.
Ula kyntu ia ki MLA ki MDC jong ka party haba ki leit ban ialap sha ki shnong ki thaw kim dei ban ong ba un jop ma u hynrei ki dei ban khein ba kan jop ka party bad mynta ka por kala dei ban kamai spah kamai phew na ka bynta ka jaidbynriew.
“Ngam dei tang ban iasaid ain tang ha Iing kashari hynrei mynta ka la mih sa kawei ka lynti iaid jong nga ba nga hap ban iasaid ha Iing Dorbar Thawain ka ri,” ula ong.
Ula bynrap ba lada un long MP un hap ban pyniadei bad kiwei ki MP na kiwei ki thain, namar lada donkam ia kano kano ka thong um lah ba leh shimet hynrei donkam ban iatreilang lang bad kiwei.
Ha kajuh ka por, ula ban jur ba lada u long MP un hap ban pynskhem ia ka 6th Schedule bad un trei shitom na bynta ka District Coyncil ban pynskhem ban pynneh ia ka riti dustur ka ri bad ka jaibynriew.
Ha kane ka sngi la ioh ruh ia ka jingkren na ki nongialam ka UDP kiba kynthup u bah Titos Chyne, u bah Pius Lyngdoh nalor kiwei de ki nongialam.