Sei ka UDP da u Bah VGK kynta, u nongiasaid ain ban iakhun ilekshon MP

Ka United Democratic Party (UDP) hynne ka sngi ka la pynbna paidbah ba ka la sei da u Nongiasaid Ain ba pawnam ka jylla u bah Vivanstone G. Kharngapkynta kum u kyrtong ban mihkhmat ban iakhun ia ka ilekshon MP shiteng samoi sha Lok Sabha ka ban sa long shen.
U President ka UDP u bah Metbah Lyngdoh haba kren sha ki lad pathai khubor, ula ong ba ka party ka la jied ia u bah Vivan halor ki nongrim ba khlain bha kaba ulah ban mihkhmat ban iasaid sha Iingdorbar thawain ka ri.
Kum ban shu pynkynmaw ba ka UDP ha ka ilekshon MP sha Lok Sabha ha u 2024 ka la sei ia u bah Robertjune Kharjahrin kum u kyrtong ka party ha kaba ula ioh 44,563 vote.
Haba kylli halor ka jingpynmih bujli ia u kyrtong ha kane ka ilekshon shiteng Samoi MP, u bah Matbah ula ong ba shong ha ka por bad mynta kaba donkam ka long ban peit ia ka jingkwah jong u paidbah. U Kyrtong ba ki pynieng mynta um dei tang u kyrtong ka UDP hynrei udei ban long u kyrtong jong ki paidbah ka konstiwensi baroh kawei.
Ha kajuh ka por, ula kam ba ka jingioh vote ka UDP ka la kiew kumba saw shah ia kaei kaba ki la ioh ha u 2024 bad kane ka pyni ba bun ki paidbah ki la wanphai biang sha ka party.
“ Ha u 2024 , ka ielskhon ka la long kum ka lyer kaba shu iaid kumto ha kaba ki paidbah khlem da sngewthuh ki la shu bud kumto. Hynrei ha u 2025 haba ngi la iaid ban pynshai, ki paidbah kiba bun ki la ai jingkyrshan ia ka party ha kaba ka party ka l lah ban ioh ia ka jingjop bad ka jingkyrshan ki paidbah ha ki san tylli ki konstiwensi bad ngi la jop haduh 5 ngut ki MDC,” ula ong.
Haba iadei bad ka Regional Democratic Alliance (RDA), u bah Metbah ula ong ba na ka por sha ka por na ka liang ka UDP bad HSPDP ka ju don ia ka mynsiem ka jingiatreilang ryngkat hynrei mynta ka kynti haba iadei bad ka ilekshon MP, na ka liang ka HSPDP namar ba ka don ia ki daw kiba long hapoh ka party hi, kim pat shym la lah ban ai ia ka rai na bynta ka ilekshon MP la kin iadon ryngkat ne em.
U bah Metbah ula ong ba ka daw ba ka UDP ka pynbna noh ia ka kyrteng u bah Vivan, ka long namar ba ka por ka ladei bad ym long shuh ban ap bad nang pynslem bad ka party ka la iaid shakhmat. Hynrei ka jingkhang ka dang plie bad ka dang ap ia ka rai ka HSPDP la kan ai ka jingkyrshan.
“Ka UDP ka ieh ha ka rai ha ka HSPDP ia kaei ka bynta kaba kin shim bad kin sa ai jingtip kum ka party. Ngi la iaid shakhamat da ka jingiasngewthuh jingmut hynrei ka jingkhang ka dang plie bad lada ki shim ia kano kano ka rai, ngin da sngewkmen eh ba kum kawei na ki party riewlum kiba don ha kajuh ka rynsan ba kin shim ia ka rai ba kin ai ka jingkyrshan ia ngi,” ula ong.