Ha ki 10 snem bun ki jingkynshew la pynjanai ia ki jingtei ban kyntiew ki lad kamai kajih

Ka Myntri Pla Tyngka ka Ri India, Nirmala Sitharaman mynta ka sngi, ka la plie ia ka seminar halor ka phang “Leveraging Externally Aided Projects in Northeastern States” ha ka jingiadon ryngkat u Myntri Rangbah ka Jylla Conrad K Sangma. La don lang ki Myntri Rangbah ka Assam, Mizoram, Nagaland, Sikkim bad Tripura nalor ki Heh Ophisar na ki phra tylli ki Jylla ka thain Shatei Lam Mihngi, ka Department Economic Affairs, ka World Bank, Asian Development Bank, International Fund for Agricultural Development, German Development Bank, Japan International Cooperation Agency bad ka Asian Infrastructure Investment Bank bad kiwei ki paralok ba pyntrei ia ki kam pynroi.

Ha ka jingkren jong ka, ka Myntri Pla Tyngka Nirmala Sitharaman, ka la ong ba ka seminar ban pynkhlain ia ka jinglah treikam ki Institution ha ka thain Shatei Lam Mihngi ka long ba kongsan ban tei ia ki Institution ba khlain bad kiba don ka bor ban trei na ka bynta ka jingkiew shaphrang.

“Kane ka workshop ba ar sngi ka wanrah lang ia ki nongthaw policy, ki paralok ba pyntrei ia ki kam pynroi na kylleng ka thain Shatei Lam Mihngi, ka pyni ia ka mynsiem jong ka jingiatreilang, ka jingiatehlok bad ka juh ka jingthmu kaba la nang mih ban batai ia ka lynti iaid ka roi ka par jong kane ka thain” kala ong.

Ka la pyntip ruh ha kine ki shiphew snem ba la leit, bun bah ki jingkynshew ki la nang pynjanai ia ki jingtei, pyniar ia ki lad pyniasoh, pynkhlain ia ki jingshakri ia ka imlang sahlang bad kyntiew ia ki lad kamai kajih ha ka thain baroh kawei. “Ka bynta ban wan ka donkam kham bun ban ia ka jingkynshew marwei bad ka donkam ia ki institution kiba khlain, ka jingdon ia ka bor ba lah ban trei kham bun, ka jingiatehlok kaba khlain bad ka jinglah ban pynkylla ia ki kabu sha ki jingmih na ka roi ka par kiban neh shirta.

Ka la ong ruh ba ka jingthmu kam dei eh tang ban iakren ia ka jingbei tyngka ia ki project hynrei ban tei ia ka rukom treikam kaba khlain, ki Institution bad ka jinglah treikam ba kham khlain ki ban nang pynsted ia ka jingpynkylla ia ka thain Shatei Lam Mihngi bad pynlah ia man ki Jylla ba kin pyndonkam pura iala ka jong ka jinglah treikam.

Ka Myntri kala ban jur ruh halor ki phra tylli ki mat ki ban pynlah treikam na ka bynta ka roi ka par jong ki phra tylli ki Jylla bad ka thain, haba seng ia ka nongrim jong ka jingiai neh bad ba kynthup lang ia baroh jong ka thain. Haba kdew ia kine ki mat, kala ban jur halor ka jingdonkam ki nongialam, ka jinglah treikam ki Institution, ka sap bad jingshemphang ki briew, ka roi ka par ba lamkhmat ki kynthei, ka jingkynshew kam ki shimet, ka lad pyniasoh, ka mariang, ka dei riti bad ka roi ka par kaba neh.

Ka la pyntip ruh ba ka Department of Economic Affairs kala pynjan bha ia ka jingiatreikam lang bad ki paralok bapher bapher ban kyrshan ia ka roi ka par ba hakhmat eh ka ri India na ka bynta ka jingmih ba kham bha na ka bynta ki nong shongshnong.

Haba ai jingkren, u Myntri Rangbah Conrad K Sangma, ula pdiang ia ki Myntri Rangbah, ki Heh Ophisar bad ki paralok ba iatreilang haba pynpaw ia ka jingkongsan ka jingpyndonkam ia ki prokram bad ki skhim ha ka lynti ban kyntiew iaka ioh ka kot jong ki Jylla, ka thain bad ka Ri.

Ula kren halor ki jingmyntoi jong ki Externally Aided Project (EAP) ha ka thain Shatei Lam Mihngi haba pynpaw ba haduh 15 tylli ki EAP ha ka Jylla ki dei kiba phaikhmat sha ka jingpyniaid ia ki spah mariang, ka koit ka khiah, ka jingbam teimet, bad ki jingtei.

Halor ki jingeh ha ka liang ka pisa tyngka bad ka jingkhein halor ka jingkiew, u Myntri rangbah ula kren halor ka jingktah jong ki jingai jingmut ka Finance Commission ia ki Jylla ka thain Shatei Lam Mihngi bad kyrpad ban weng noh ia ka jingbuh pud halor ki EAP bad ban shah ia ki Jylla ba kin pynkhlain ia ka jinglah ban pyntrei ia ki kam bad ban shim kabu kat kaba lah na ki project kiba lah ban ioh.

U la ban jur ruh ia ka jingdonkam ka jingiatreilang hapdeng ki Jylla ka thain Shatei Lam Mihngi ha ki kam bapher bapher ba kynthup ia ka kam jngohkai, ka rep ka riang, ka jingtei ia ka jingim ki samla bad kiwei kiwei.