Leit jurip u Bah Sanbor ia ka jingtei Shillong Ropeway Project ba T.151 klur

U Myntri ka Sorkar Jylla u Bah Sanbor Shullai uba long ruh u MLA ka South Shillong Constituency ryngkat bad ki nongialam ka seng BJP Meghalaya hynne ka sngi, ki la leit jurip ia ka jingtei ia ka Ropeway Project ha Madan Laban ia kaba la bei tyngka da ka Ministry of DoNER ha ka jinglut jingsep kaba kot T.151 Klur.

Ka kynhun jong ka seng BJP ryngkat ka jingdonlang ki heh ophisar jongka NEC, ki ophisar na ka tnad Tourism, ki nongialam shnong ka Madan Laban, kila jurip ia katei ka jaka bad ia ka rukom pyniaid shakhmat ia ki kam ki jam baroh da ka KEC-TCL Shillong Ropeway JV kaba pyntrei ia katei ka projek.

U Bah Sanbor Shullai ula ong, ba kane ka jingjurip kadei kum shi bynta jong ka Pragati Path Yatra ban peit bniah ia ki skhim kiba la bei tyngka da ka Sorkar Pdeng kum ka jingdap 12 snem ka Sorkar Pdeng hapoh ka jingialam u Myntri Rangbahduh ka ri u Narendra Modi.

Kane ka dei kawei na ki projek jngoh kai pyrthei kaba heh bha ha ka nongbah Shillong ka lah ban treikam naduh u snem ban wan, ha kaba ka kompani kaba pyntreikam ia ka Shillong Rope Way Project kala pynthikna ban pynsted ia ka jingtei hadien ba lah ban weng ia ki jingeh ha ka por ba sdang ia kane ka project.

U Bah Sanbor u la ïathuh ba ka Shillong Ropeway Project kaba la mynjur ha u snem ba la dep ha ka jinglut kaba ym duna T.151 klur, ha kaba sdang nyngkong eh ki kam ki la sahteng namar ka jingdonkam ïa ki jingbit ban pom dieng bad ka jingdon kiba mudui da ka Public Interest Litigation (PIL) ha Meghalaya High Court, hynrei haba ka iingbishar ka la weng noh ia ki PIL bad ka jingioh jingbit na ki tnat bapher bapher, ka jingpyntei ia ka Project kala iaid mynta shakhmat.

Watla ka por ban pyndep ia kane ka projek ka kadei haduh lai snem, hynrei u Bah Sanbor ula ong, ba ka kompani ba pyntreikam ka la pynthikna ba kan pyrshang katba lah ban pyndep ha u snem ban wan bad ula iathuh ruh ba la siew T.3 klur sha ka Raid Laban Dorbar kum ka jingsiew bai lutksan na ka bynta ki jaka ba la shim na ka bynta katei ka projek.

Ula ong, lyngba ka Shillong Rope Way la khmih lynti ba kan long kum ka jaka jngohkai pyrthei kaba pawnam, ka ban khring ïa ki nongwan jngohkai pyrthei na kylleng ka ri ka ban thaw ruh ïa ki lad ïoh kam ïoh jam bad kan kyntiew ruh ïa ka ïoh ka kot ia ki paid nongshong shnong ha ka thaiñ bad ia ka jylla hi baroh kawei.