Kmen ki paidbah ka thain Upper Shillong ba suk ka leit wan na ka surok ‘Four Lane’

Baroh shi katta kiba bun ki paitbah ki thnum bad kynthoh jur ia ka Sorkar Jylla halor ka jingsuki bad jingslem palat ban shna pyndep ia ka surok Four Lane ha ka thain Upper Shillong, hynrei mynta ynda lah dep shna ia kane ka surok la sakhi ba ka la pynsuk syndon ia ka leit ka wan ki paitbah.
Ia kane ka surok Four Lane la shna naduh na Jingkieng Umshyrpi shaduh ha Hynniewmer, Upper Shiillong bad ha kine ki khyndiat snem ba la dep, ki paitbah ki la bitar lep namar ba ki la mad ia ka jingeh na ka jingdheng kali haba ki leit ki wan lyngba ka surok ha Upper Shillong, katba dang shna ia kane ka surok Four Lane ka dei shibynta jong ka projek shna surok na Shillong sha Dawki ba la bei tyngka da ka JICA.
Haba iakren bad ki paitbah ki la pynpaw ba ka jingslem ban shna ia ka surok Four Lane ka la pynbitar ia kiba bun balang, namar ka la ktah jur ym tang ia ki nongleit nongwan ki nongjngohkai pyrthei hynrei wat ia ki khynnah pule, ki nongrep kiba leit rah ia ki marrep sha iew sha hat bad kali kamai bad kumta ter ter.
Hadien ba la dep shna ia kane ka surok ki paitbah ki la ong, mynta ki dap da ka jingsngew tynnad naduh ba lah dep shna ia ka surok Four Lane ka la pynsuk bad kloi bha ka leit ka wan ha ka thaiñ Upper Shillong.
Ki nongniah kali kamai ki la ong, baroh shi katta ka shim por da ki kynta ban poi sha Iewduh na ka thain Umlyngka, namar ba jur ka jingdheng kali hynrei mynta tang hapoh ka 10 minit ki la poi sha Iewduh.
Ki la ong, ha ka por ba shna ia katei surok ka la hiar bha ka jingioh kamai ki nongniah taksi, hynrei mynta ka jingdheng kali ka la duna bha ka jingioh kamai ka la kham biang.
Haba iakren bad ki samla pule ki la ong, ba mynshwa ki hap ban mih lypa shi kynta shiteng na iing ban poi sha ki jaka pule hynrei mynta kim donkam shuh ban mih dang kloi naduh ba la dep shna ia ka surok.
Kine baroh ki la kubur ha ka por ba dang shna ia ka surok Four Lane ki la thnum bad bitar, namar ba kim lah ban poi ha ka por ba biang sha ki jaka ba ki thmu ban leit, hynrei mynta ki la pynpaw ba ka surok Four Lane ka long ka jingmyntoi bad ka jingkyrkhu ia ki paitbah baroh khamtam ia kito ba sah ha thain Upper Shillong.
Ki paitbah ki la ai khublei ia ka Sorkar Pdeng, ka Sorkar Jylla ba la ialam da u Myntri Rangbah u Conrad K Sangma bad khamtam ia u Symbud Myntri Rangbah u Bah Prestone Tynsong ba khmih ia ka tnad PWD (Road & Buildings) kiba la shimkhia ban pynthikna ba kane ka projek shna surok kan urlong noh bad ban pynsuk ia ka leit ka wan ki paitbah bad ki nongjngohkai ba wan na kylleng ki jylla bad ki ri bapher.