Ïakynduh u Bah John ïa u Thierry ka France ban kyntiew ïa ka kolshor bad kam ïalehkai

U Working President ka Meghalaya State Olympic Association (MSOA) bad u Co-Chairman ka Meghalaya State Planning Board u Bah John F. Kharshiing hynne ka sngi ula leit iakynduh ia u French Consul General u Thierry Morel ha Kolkatta ban iakren halor ka jingdonkam ban kyntiew mar kylliang ia ka kolshor bad ia ka kam ialehkai.

Ha kane ka jingiakynduh u Bah John Kharshiing, ula iatai ia ki lynti ban pynngam jylliew ia ka jingiadei bad ka ri France, khamtam ha kaban kyntiew ia ka jingialehkai bad ka jingsam jingtip mar kylliang hapdeng jong ki nongialehkai.

Kila iakren ruh halor ka jingseisoh ka Meghalaya kham hashwa ha ka jingialehkai Football bad ka kynhun Ialehkai Lyon, kaba la ai jinghikai pyntbit ia ki nongialehkai kiba dang khynnah kiba na ka jylla bad kila mynjur ban wad ia ki lad ki lynti ban pyniar ia ki prokram ha kiwei kiwei ki jingialehkai ruh.

U Bah Khrashiing ha ka kyrwoh kaba ula phah ula ong “Ka jingialang kala iakren ruh halor ka jingiasoi ia ka MOU hapdeng ka Ministry of Youth Affairs and Sports, ka Sorkar India bad ka Ministry of Sports jong ka French Republic ban iatreilang ha ki jingialehkai, kaban kynthup ia ki Coach bad ka jingphylliew jingmut kaba mar kylliang hapdeng ki nongialehkai, Sports Science, Medicine, ki jingtei bad ki jingai jinghikai pyntbit”.

Nalor kane ula pynpaw ba ka Jylla Meghalaya kala iaid shakhmat ban kyntiew ia ka jingtbit ha ka kam ialehkai ha ka jylla bad ia ka jingdonkam ban phaikhmat ha kiwei pat ki bynta kiba kynthup ia ka Technical Support, ka jingiasam jingtip mar kylliang hapdeng ki Coach, ki prokram ai jinghikai bad ka jingiatreilang bad ki jaka ai jinghikai.

U Working President ka MSOA ula iawer ruh ia u Morel ban wan jngoh ia ka Shillong ban iatai sani shuh shuh halor ki kabu jong ka jingiatreilang bad ka jingmyntoi lang hapdeng ka jongki bad ka jingialang kala kut ha kaba kila kut jingmut ban kyntiew iaka kolshor bad ia ki kam ialehkai lyngba ka jingiatreilang hapdeng ka jongki.