Ym treikam ka tnad Forest ha Jirang, jur ki kam khaii dieng tuh sha Assam

Ka jingkhaii tuh kynthup ki dieng sawdong, rnga, khyndew bad maw na Meghalaya sha Assam ka jur bha ha kine ki sngi na thain Jirang lyngba ka surok MMR Road bad na shnong Nongrim Jirang sha Assam.
Ha katei ka thain la lap ruh ba ki kor ot dieng beain ki jyllei bha ha thain Jirang khappud bad ka Assam kaba pynlong ia ki khlaw ki btap ban synlen na ka jingpom dieng pathar, hynrei kaba lyngngoh ki bor ba dei peit kum ka tnad Forest bad ka District Council ki leh kumba matlah bad kim ju leh eiei ia kine ki kam khaii tuh ne ia ki kor ot dieng (sawmill beain) kane ka pynlong ia ki nongkhaii ban trei katba mon bad shalan tuh ia ki dieng bad kiwei mar na Meghalaya sha Assam.
Kumjuh ki bor ba dei peit ka Hima Jirang ruh kim ju leh eiei bad ha jaka ban khang kum kine ki kam be-ain, hynrei ki ai lad pynban ia ki briew ban buh kor ot dieng ne sawmill. La lap bun ki sawmill ki dei ba pyniaid da ki khar na Assam ha kyrteng jong ki Khasi na Jirang ban ai lad ia ki dkhar ban wan kamai spah ha Meghalaya da kaba shalan tuh ia ki dieng bad kiwei ki mar khlaw sha Assam.
Ki ophis jong ka tnad forest ba don ha Rani Jirang bad Iew Mawroh kim peit ne tehlakam ia kine ki kam khaii dieng tuh bad kumjuh ka ophis District Council ba don ha Paham Umshru, kane ka pynpaw ka lah ban don eiei shalyndet ba ki nongkhaii dieng kim salia ban iaid ban ieng mynsngi mynshai ha katei ka thain.
Ka jingthmu ka sorkar ban buh ia kitei ophis ka long ban tehlakam ia ki kam khaii tuh kiba long beain khamtam katei ka thain ba don ha khappud, hynrei kumba long mynta kitei ki ophis kim shym trei ban khanglad ia ki kam khaii tuh kaba pynlong ia ki dkhar ban kit ia ki dieng, ki siej, khyndew bad maw na Meghalaya sha Assam.