Lada ka sorkar kam lah ban pynbeit Byrngem ka HYC ban ym ai lad intarbiw thungkam CM LEAD Fellowship

Ka Hynniewtrep Youth Council (HYC) hynne ka sngi ka la iakynduh ia u Officer on Special Duty (OSD) jong ka SSA SEMAM u Dr. Andrew Warjri ban dawa ban pynbeit halor ki kynrum kynram ba ia dei bad ka jingpynbna thung kam ha ka Meghalaya CM LEAD Fellowship Recruitment.

U President ka HYC u bah Roy Kupar Synrem haba kren sha ki lad pathai khubor, ula ong ba ka sorkar jylla ka la pynmih jingpynbna ne ka Advertisement ba lait 12 tylli ki kam Fellowship ba la tip kum ka Chief Minister Leadership in Education and Development Fellowship. Hynrei kaba sngew lyngngoh ka long na kine ki 12 tylli ki kam ba lait, 8 tylli la bhah na bynta ki samla trai ri bad 4 tylli na bynta ki briew nabar.

“Kaba lyngngoh ka long ba ha ka jingpynbna ym shym la kdew ba yn bhah 4 tylli ki kam na bynta ki briew nabar bad 8 tylli na bynta ki trai ri,” ula ong.

Halor kane, na ka liang ka seng ka la phah ka shithi sha u Myntri Rangbah ka jylla u Conrad K. Sangma lyngba u OSD ka SSA- SEMAM ban dawa ba dei ban pynbeit mardor ia kane ka kynrum kynram ba iadei bad kane bad la byrngem ba lada kim lah ban pynbeit, ka seng kan ym ai lad ban iaid shakhmat ka Intarbiw ban long ha ka 30 bad 31 tarik, Naitung 2026.

Ula ong ba ka jingthmu jong ka sorkar ka long ba kine ki 12 ngut ki don ha man ki district jong ka jylla ba kin iatreilang ryngkat bad ki tnad treikam ka sorkar ban pyntikna ba ki skhim bapher ka sorkar jylla kiba ia dei bad ka tnad pule puthi yn pyntreikam bad lada lap ia kino kino ki jingduna kine ki Fellowship kin long kum ki nongai khubor sha ka sorkar ban pyntip ia ki jingduna.

“Ha ka jingpynbna laitkam la khot ba kiba lah ban aplai kin dei ki samla kiba la pas ia ka Post Graduate ha kino kino ki jingpule bad ha ka jingpynbna ym shym la kdew ba na ki 12 tylli kam, 8 tylli ki kam yn bhah na bynta ki trai ri bad 4 tylli ki kam yn buh na bynta ki briew ba nabar. Ka CM LEAD Fellowship Programme kadei ka prokram jong ka sorkar jylla bad ka pisa la bei da ka sorkar jylla. Ngim sngewthuh kaei ka nongrim, ba la bhah 4 tylli ki kam na bynta ki briew ba na shabar,” ong u bah Roy.

Ka seng ka la dawa ba ka sorkar jylla kadei ban weng mardor ia kane ka bhah ba la mang na bynta ki briew nabar jylla bad ka sorkar jylla kadei ban sngewthuh ba kum kine ki projek dei ban thung ia ki briew trai ri namar ba ki don bun ki samla kiba la bit ban trei ia kane ka kam.

“Ha ka jaka ba ka sorkar kan ai mynsiem, ka la pyndap pynban da ki briew ba nabar,” ula ong.

U President ka HYC ula ong, na ka liang u OSD ula kam ba um don jingtip eiei ia kane bad ula kam ba la don mano mano ba leh bakla khlem ka jingtip jong u.