Shwa u 2018 ym ju khot tynder palat spah klur

U Symbud Myntri Rangbah ka Jylla u Bah Sniawbhalang Dhar uba long ruh u National Vice President ka NPP ula ong, ka Meghalaya ha shwa u snem 2018, ym ju iohi ba kan khot tender ia ki surok palat ia ka spah klur hynrei ha ka sorkar ba mynta ka jingkhot tender ia ki surok da ki hajar klur.

Ia kane ula kren ha ka jingialang ialap elekshon MP ha Ri Bhoi, ban kyrpad ia ki paitbah ban ai jingkyrshan ia u kyrtong ka NPP ban iakhun elekshon MP shiteng samoi na Shillong Parliamentary Constituency.

Haba kren ha katei ka jingialang paitbah, u Bah Sniawbhalang ula ong, “Hashwa u snem 2018, ngi ngim ju iohsngew ia ka jingkhot tender ia ki surok kaban kot ia ki spah klur. Mynta phi iohi da ki hajar klur namar ba ka Sorkar India kala bhah ia katei ka tyngka kum ka dak ban burom ia ka sorkar ka jong ngi” bad ka ong, ba ka Meghalaya mynta kala sakhi ia ka jingkiew kynsan hapoh ka sorkar kaba la ialam da ka NPP.

Ula ong ba ha u snem 2018 haba ki lah thaw ia ka sorkar MDA-I, ka Mang Tyngka kala long tang T.9,000 Klur hynrei mynta kala palat ia ka T.30,000 Klur bad kane ka lah urlong kadei namar ba ka sorkar kala leh ia kaei kaba kadei ban leh bad ha kine ki 8 snem kiba la dep, wat ki projek ka Sorkar Pdeng kaba la bhah ia ka jylla kala palat ia ka T.42,000 Klur.

U Bah Sniawbhalang ula ong, ba u Myntri ka Sorkar Pdeng u Nitin Gadkari dang shen ula buh mawnongrim ban tei ia ka projek kaba T.3,000 Klur bad pynbna ruh sa ia ka T.39,000 Klur na ka bynta ka jylla bad 7 ne 8 ngut ki myntri ka Sorkar Pdeng kila wan jngoh ia ka Shillong ha kine ki 10-15 sngi kiba lah dep, ban bishar ia ki kam bad ia ki projek ha ka thain shatei lammihngi bad kila ioh ia ki jingpynsngew ba ka jylla Meghalaya kadei kawei na ki jylla kaba la pyndonkam thikna bha ia ka bhah tyngka jong ka Sorkar Pdeng.

Ula ong, ba ka sorkar kala pynleit jingmut palat ban ia ki surok bad ha ka kam ialehkai, ka Meghalaya kan ioh ia bun ki madan artificial ban ialehkai football ha ka ri bad ia ka Stadium kaba heh tam ha ri India kaba dang tei ha Mawkhanu ha ka jinglut kaba kot T.700 Klur.

Ula iathuh ba ha ka kam jngohkai, ka Mang Tyngka kala kiew na ka T. 40-50 Klur shwa u snem 2018 sha ki hajar klur man la ka snem. Ki Homestay kila roi na ka 500 sha ka jingbuh ia ka thong kaban kot sha ki 5000 tylli ha kaba ka sorkar kan ai jingkyrshan da ka Subsidy bad kumba 7,000-7,500 tylli ki kali ki wan rung sha Shillong man la ka sngi ha kaba la antad ba kan wanrah kumba T.1,100 Klur ha ka kam jngohkai man la ka snem.

U Symbud Myntri Rangbah ula ong, ba ka sorkar kala shim ia ka rai kaba jwat ban pyntreikam ia ka jingsiew tulop kaba thymmai ia kumba 23,000 ngut ki nonghikai bad ka sorkar jylla kala pynleit jingmut ha baroh ki liang ban kyntiew ia ka roi ka par bad ia ka ioh ka kot jong ki paid nongshong shnong.