Syrtap ki pulit RAF ha Khyndailad ban khanglad ia ki nongshim kabu bad pynthud ai ka shongsuk shongsain

Ki bor sorkar ki la pynjur pahara ha nongbah Shillong khamtam ha Khyndailad bad pynjari kyndon 163 BNSS hadien ba ka Khasi Students Union (KSU) ka la pynbna ban pynlong ia ka jingiashong kyllain mungor ne Sit in Demonstration ha Khyndailad.

Naduh ka por mynstep ki pulit ki la syrtap ha kylleng ki jaka kiba kongsan jong ka nongbah Shillong ban pynthikna ba ka seng KSU kan ym iohald ban pynlong ia kino kino ki jingiakhih kiban pynmih ia ka jinghuri hura bad ban ktah ia ka shongsuk shongshngain ha ka jylla baroh kawei.

Kane ka jingpynjur ia ka jingpahara da ki Rapid Action Force, CRPF, Special Operations Team (SOT) abd ki pulit jong ka district, kadei namar ba ki bor pyniaid district kila pynbna ba kila pynduh noh ia ka jingai jingbit ia ka KSU ban pynlong ia ka ‘sit in demonstration’ hadien ba kila sakhi ia ka jingmih ki kam thombor bad ka jingpynjulor ia ki kali bad jingshah ktah ki paitbah ba iaid ba ieng, ha ka Black Flag Bike rally ka ba la pynlong da ka KSU ha ka 19 tarik u Nailar.

Wat haba ka KSU ka la pynsangeh noh ia kane ka jingthmu ban pynlong ia ka jingiakhih kaba jai jai, hynrei ki bor pyniaid district bad ki pulit kila bteng beit ban pahara ha kylleng ki thain bad la sakhi ruh ba ki pulit kila khmih bniah ia ki thuk thuk bad ia ki kali kum ka jingshim ia ka sienjam ban ym ailad ia kino kino ki riewshimkabu ban thaw ia ki jingklumar ne ban pynthud ia ka shongsuk shongsaiñ.

Lah ban kdew, ka KSU kam shym la pynlong shuh ia ka jingiashong kyllain mungor hadien ba kam shim la ioh jingbit shuh na ki bor pyniaid district hynrei ki nongialam ka seng kila leit ban iakynduh noh ia ki 36 ngut ki MLA na ka rilum Khasi bad Jaintia ban pynbor ba kidei ban kren ia ki mat jingdawa jong ka KSU hapoh jong ka ïingdorbar thawaiñ ka jylla.