Ai dorkhas ka KSU ia 36 ngut ki MLA ban kren ki mat jingdawa ha Dorbar Synrai

Ki Nongialam jong ka Khasi Students’ Union (KSU) hynne ka sngi, ki la leit dorkhas sha baroh 36 ngut ki MLA na ka ri-lum Khasi bad Jaintia ba kin rah bad ban kren halor ki 5 tylli ki mat jingdawa ka KSU ha ka Dorbar Synrai ka ban sdang naduh ka 24 tarik mynta u bnai.

U Assistant General Secretary ka KSU u Samla Pynshai Rani ula pyntip ba ka KSU ka la dorkhas sha baroh ki 36 ngut ki Nongmihkhmat Paidbah (MLA) ka Bri u Hynniewtrep kum shibynta ban pynbor ia ki Nongmihkhmat ban kren bad pynsngew ia 5 tylli ki mat jingdawa hakhmat ka Sorkar Jylla.

U la bynrap nalor 36 ngut ki MLA na Ri Lum Khasi ka seng kan pyrshang ruh ban pynpoi ki dorkhas sha ki 24 ngut ki MLA na ka Ri Lum Garo.

Ha kane ka jingleit dorkhas sha ki MLA la iadonlang ki dkhot na ki Unit bad Circle ba hap ha ki konstitwensi ba ki MLA ki mihkhmat.

“Ia ki MLA la jied da ki paidbah bad kadei ka kamram jongki ban kren ia ki mat ki jura kiba ktah ia ka lad iohkam iohjam bad ia ki jingeh jong ka Jaitbynriew baroh kawei. Kumta ka seng ka ieh ha ka jingstad jong ki Nongmihkhmat ia ka kamram kaba ki dei ban leh” la ong u Nongialam ka KSU.

Ka Seng kan ym shong kli kti ban iakhih ia kitei ki mat jingdawa katba ka sorkar Jylla kam pat lah ban pyntreikam pura ia ki jingangnud kiba ka seng ka la buh ha khmat ka Sorkar.

U samla Pynshai Rani ula pynbna ka KSU da kawei ka jingmut ka la rai ban pynlong ia ka ‘Sit in demonstration’ lane ka jingshong kyllain̈ Mungor ha ka 24 tarik ha u Mot Woh Kiang Nangbah mar pyrshah ka Civil Hospital, Shillong naduh ka por 11 baje mynstep.

Ha ka sngi ba bud 25 tarik kan pynlong ia ka ‘Sit in Demonstration’ ha ki 7 tylli ki District ka Bri 7 Trep.

Ka KSU ka pyntip ha ka 22 tarik kan ym buh prokram iakhih khnang ban ym pynwit ia ki samla ban iakhun Eksam LDA ba la pyniaid da ka MPSC.