Sha Garo Hills kynriah ia ki nongialam KSU, nangjur ka jingiakhih, shah thang kali ha Nongstoin bad ophis NPP

“Ban pynurlong ia ki mat jingdawa 24 tarik yn shong kyllain̈ Mungor ha Mot Woh Kiang Nangbah, 25 tarik ha ki 7 ki District ka Bri 7 Trep” ai kane hapdeng ma kum ka pasoh

Shillong, Nailar : Ka jingiakhih ka nangjur ha kylleng ki District ha Khasi-Jaintia bad Ri Bhoi hadien ba ki nongialam ba hakhmat ka KSU ki la shah kem ha ka miet 19 tarik Nailar na Jaiaw, Shillong.

Ka khubor ka iathuh ia kine ki nongialam ka KSU, ki pulit ki la kit noh na Shillong hynne ka sngi ha Garo Hills ban set ha ki phatok ha ri-lum Garo.

La iathuh ia u President ka KSU u samla Raymond Kharjana yn set ha District Jail, Williamnagar katba ia u Vice President u samla Pynkmenlang Sanmiet bad u General Secretary u samla Reuben Najiar yn set ha District Jail Tura.

Ia ki nongialam ka KSU la pynkit sha Garo Hills hapdeng ka jingpahara jur ki pulit, khamtam namar iing kashari ka District & Session Judge ka la hukum ban set 14 sngi hapoh ka Judicial Custody.

Kum ban pynpaw la pynngat ha ki kyndon bapher ka Bharatiya Nyaya Sanhita, 2023 halor ki kam thombor ha ka jingiaid Rally ar shaka ha ka 19 tarik Nailar namar ka jingshah pynjulor ki kali bad pynmynsaw ki riew luilui ba iaid ba ieng kaba la ktah ia ka shongsuk shongsaiñ.

Kumjuh la iathuh ar tylli ki kali sorkar ha Nongstoiñ, West Khasi Hills District, ki la ingkhong lut plaiñ hadien ba la suba ba ki runar ki la thang ha ka miet 20 tarik Nailar, 2026. Ki runar ba donkti ha kane ka kam ym pat lah ban ithuh haduh mynta.

Kitei ki kali sorkar ki kynthup kawei ka Mahindra Maxx ba don u registration number ML-01 4130 ba pynïeng ha phyllaw ka Nongstoiñ C&RD Block. Kawei pat ka Gypsy ba pynïeng ha phyllaw ka Sibsingh Syiem Inspection Bungalow, PWD (Road).

Katkum ka jingïoh lum jingtip kane ka la jia ha ka por kumba 11:30 baje mynmiet ka 20 tarik Nailar.

Shuh shuh ha kane kajuh ka miet, ka ophis jong u SE, PWD (Road), Nongstoiñ ka la shah kawang petrol bomb ha ki runar bym lah ithuh, hynrei ki jingjulor ki pynpaw ka dak jong kane ka jingjia.

Ki bor pulit ka iathuh ba la ujor ejahar halor kane ka jingjia bad ki dang pynlong ka jingtohkit ban lap ïa ki runar ba donkti.

Ha kajuh ka por, la iathuh ka ophis barim ka National People’s Party (NPP) ha Lachumiere, Shillong, ka la shah kawang petrol bom hynne ka sngi ha ka por 5 baje eiei, hynrei ki pulit ki la iathuh u bom u khlem bthei bad ym don kano kano ka jingjulor.

Ka kynhun pulit bad ka Forensic ki la poi ha ophis ban tohkit bad lum ki sakhi bad ki Pulit ki la register case halor kane.

Kumjuh kawei ka Bike ba pynieng harud surok Malki, ka la shah wiang ding ha ki runar ha kajuh ka step.

Kum ban pynpaw ka Nongmensong Police Station ka la shah kawang petrol bom ha ka miet 20 tarik Nailar kaba la pynjulor ia ka shuki bad kynroh.

Kumjuh ka KSU, ka byrngem ba kan ym shong kli kti bad kan iaid btneg ban iakhih tad haduh ban da ioh ia ki mad jingdawa ban pynurlong ia ki jingangnud ka seng bad ki paidbah ka jylla ban iada ia ki trai ri trai muluk.

U Assistant General Secretary ka KSU, u Samla Pynshai Rani ula pynbna ka KSU ka la rai ban pynlong ia ka ‘Sit in demonstration’ ne ka jingshong kyllain̈ Mungor ha ka 24 tarik ha u Mot Woh Kiang Nangbah mar pyrshah ka Civil Hospital, Shillong naduh ka por 11 baje mynstep.

Ha ka sngi ba bud 25 tarik kan pynlong ia ka ‘Sit in Demonstration’ ha ki 7 tylli ki District ka Bri 7 Trep ban pynbor ia ka sorkar jylla ban pynurlong ia san tylli ki mat jingdaw ka seng.