Pyllait u Conrad bad Bah Sanbor ïa ‘Ki Dienjat’

U Myntri Rangbah ka Jylla u Conrad K Sangma ryngkat lang bad u Myntri ka Arts & Culture u Bah Sanbor Shullai, hynne ka sngi, ula pyllait ia ka, ‘Ki Dienjat’, ka jingwadbniah na ka bynta ban bishar bniah biang ia ka jingdon jingiadei ka rukom im bad ka kolshor jong ki paid Khasi-Jaintia bad ka dewbah Southeast Asia.

Ha kane ka jingialang la iadonlang u Nongbishar ka Meghalaya High Court u Justice Hamarsan Singh Thangkhiew, Principal Secretary, Arts & Culture, ki dkhot ka kynhun wadbniah bad ki Ophisar na ka tnad Arts & Culture.

Haba kren ha ka jingialang u Myntri Rangbah ula ong, “Ki Dienjat”, kadei ka lynti iaid ban shem pat-pyniasoh biang ia ka mynnor jong ngi khnang ba ngin lah ban sngewthuh kham bha ia ka mynta bad pynwandur ia ka lawei jong ngi. Ula bynrap ba ka jingpynlait ka dei shibynta jong ka jingpyrshang ba iai bteng ban buh jingthoh, tyngkai bad rakhe ia ka kolshor bad ka histori jong ka Jylla jong ngi bad ban ai ha ki briew ia ka atiar ban lap biang iala ka tynrai.

Ula ong, haba pynshong nongrim na ki kot ki sla jong ka juk synshar ka ri Bilat bad ka jingstad nala tynrai, ki scholar bad ki nongwad bniah trai ri, kala poi sha ka jingmynjur lang ba ka Jaidbynriew Khasi bad Jaintia ki lah ban dei kiba mih na ki jaka kiba la tip mynta kum ka Cambodia bad Laos.

Ula pynpaw shuh shuh ba ki jingwad bniah ia kaei kaba long ba man mynta ban pynshisha ia kine ki jingdon jingiadei kat kum ka histori kala shah khanglad da ka jingduna ka jingbei tyngka ban leit wad jingtip shabar Ri, ki jingeh ha ka liang ka jingpynbiang ia ki jingdonkam bad ki jingiadei sain pyrthei ban leh ia kine ki thain, ka jingbym don ka jingiatreilang kaba la pynbeit ryntih ha ka kam pule bad wad bniah, bad ka jingkyrshan ba pahuh ia ki jaka pule.

“Ban weng ia kane ka jingeh, ngi la thung ia ka kynhun wadbniah ba kyrpang hapoh ka Tnad Arts & Culture, haba wanrah lang ia ki scholar ba pawnam bad ki Ophisar ba kin ialam ia ka jingpyrshang ban leh bniah, jingpyrshang ban wad jingtip, buh jingthoh bad shong bishar ia ki tynrai ki longshuwa jong ki Jaidbynriew jong ngi” la ong u Conrad.

U Myntri Rangbah ula ong ba ka Ki Dienjat e-Portal kadei kaba la pynwandur ban lah pynlong ia ka jingwad bniah kaba kham treikam, kaba lah ban iohi da baroh bad ka rynsan ban ioh ia ki jingtip, ban lum thup ia ki jingtip/data wadbniah bad ban pynlah ia ka jingiatreikam lang, kaban pynsted ia ka jingiakren, pynduna ia ka jingpyndonkam ia ki kot ki sla bad ka jingpynlut ha ka jingpyniaid kam nalor ka jingpynjanai ia ka jingtreikam kaba shai bad ka jingkhmih bniah.

Ula pyntip ba watla ka jingpyrkhat ban leh ia ka jingwad bniah ia ka tynrai jong ki Jaidbynriew riewlum ka Jylla kala sdang naduh ka por u (L) PA Sangma, uba la banjur ia ka jingdonkam ban leh ia ka jingwad bniah ba jylliew ia ka tynrai jong ki Garo, kumta ia kum kane ka project wad bniah yn sa pynlait ruh ha rilum Garo ha ka 1 tarik Nailur, 2026, kaba dei ka sngikha jong u (L) PA Sangma.

U Myntri Rangbah ula pyllait ruh ia ka project document ne ki kot ki sla jong ka project bad plie ruh ia ka kamra leh Research jong Ki Dienjat hapoh ka Williamson Sangma State Museum, Shillong.

Ka Tracing the Roots Project kadei ka project ban lum bad buh jingthoh ia ka histori jong ki jaidbynriew trai muluk ka Meghalaya, ka ktien ka thylliej, ka kolshor bad ka jinghiar pateng bad hapoh kane ka project, 75 ngut ki Scholar kin leit sha Vietnam, Cambodia bad Tiber ban wad bniah ia ka thymmei bad ka lynti iaid jong ki Khasi, Jaintia bad Garo sha kane ka thaiñ.