Ban plie lad ia ki samla bad pynkhlain ia ka pule puthi

U Nongaiktien ka sorkar jylla u bah Wailadmiki Shylla ula iathuh ka kynhun Myntri hynne ka sngi ka la iakren halor ki 6 tylli ki mat ba iadei bad ka tnad Pule Puthi.

U bah Wailadmiki uba dei ruh u Myntri ka koit ka khiah ka jylla haba kren sha ki lad pathai khubor ula iathuh ba ka sorkar ka la mynjur 3 tylli ki Amendment Bill, 2 tylli ki jingtyrwa University thymmai bad kawei ka Repeal Bill.

Ula iathuh ba kawei ka dei ka Maharashtra Institute of Technology, Meghalaya (Amendment) Bill, 2026 ban wanrah ia ka katkum ki kyndon ka UGC. Ha kane ka original Bill, ia u Visitor la rai da ka Sponsoring body hynrei ha kiwei ki Skulbah u Visitor u ju dei u Lat ka jylla. Ula bynrap ba la wanrah ka jingkylla katkum ka kyndon ka UGC bad katkum ka ain kaba long lang kum kiwei ki skulbah ka jylla.

U Myntri ula iathuh ba ka Board of Management Bill ka la pynbun ia ka jingdon nongmihkhmat na ka Sorkar na uwei sha ki arngut bad ha ka Board of Governors na uwei sha ka lai ngut.

Kum kane ka amendment la mynjur ruh na ka bynta ka Mahatma Gandhi University (Amendment) Bill, 2026.

“Baroh kine ki jaka pule ki la bud mynshuwa ia ka kyndon ha ka ba ia u Visitor la rai da ka sponsoring body, bad ka amendment kala pynbeit ia kane haba pynbun ruh ia ki nongmihkhmat na ka Sorkar ha ki governing body,” ong u bah Wailadmiki.

Ula ithuh ba ka kynhun Myntri ka la mynjur ban pynbeit thymmai ia ka rukom treikam jong ka Martin Luther Christian University da kaba wanrah ia ka Martin Luther Christian University (Amendment) Bill, 2026 bad ia kane ka Bill la bud katkum ka kyndon jong ka UGC.

U Bah Wailad u iathuh ba ka amendment ka khang ia ka University ban treikam tang hapoh ka Jylla Meghalaya, haba weng noh ia ka kyndon ban leh ia ka distance education ka bym shah satia ia ki university shimet.

Ka Amendment kala pynduh noh ruh ia ka bor ban pyniasoh ia ki kolej, ka bym shym la shah satia hapoh ki kyndon ka UGC.

Ka Kynhun Myntri ka la ai jingmynjur ruh ia artylli ki Bill jong ki University ba thymmai.

Shuh shuh ula iathuh ba ka sorkar ka la tyrwa ban buh ia ka Sister Nivedita University, Meghalaya Bill, 2026 ha Byrnihat bad ia ka ka Khasi Jaintia Presbyterian University, Meghalaya Bill, 2026 la tyrwa ban buh ia ka university ha Sohiong.

Katba ka Bill ba khatduh ka dei ka International Open University Bill (Repeal bill 2026). Ula ong ba ia ka Ain la mynjur da ka Iingdorbar Thain Ain ha u snem 2011 hynrei hadien une u snem, ym shym la don ba wan shakhmat bad kala shu sahkut khlem treikam tad haduh u snem 2022.

Namar kata ka Kynhun Myntri ka la rai ban pynduh noh ia ka Act namar ba ka kyrteng ka la pynkhein ia ka kyndon UGC.

“Lada phi peit ia ka kyrteng, ka dei “International Open Univerity’. Ka kyntien ‘Internatonal’ ka don, bad “Open University’ ruh ka don lang, ka bym shym la shah kat kum ki kyndon ka UGC. Kumta, ka Kynhun Myntri ka sngew ba kan bha shibun ban kiar ia kano kano ka jingeh ki ban mih hadien habud. Ta ka daw ngi la pynduh pyndam noh ia ka Act”.