Buh Mawnongrim u Conrad ia ka Hospital ba T.65 klur ban ai jingsumar ia ki mrad

U Myntri Rangbah ka Jylla u Conrad K Sangma hynne ka sngi, ula buh maw nongrim ban tei ia ka State Veterinary Hsospital ha Upper Shillong ha ka jingialang ha INDO DAN Guest House, Upper Shillong.

Ha jingialang buh mawnongrim la donlang u Myntri ka Tnad Animal Husbandry & Veterinary u Bah Sanbor Shullai, u MLA ka Mylliem Constituency u Bah Ronnie V Lyngdoh, u Chief Secretary u Dr Shakil Ahammad bad ki Ophisar ka Tnad Animal Husbandry & Veterinary.

U Myntri Rangbah ula ban jur ia ka jingdonkam ban don ka rukom treikam kaba kynthup ia baroh ki bynta ba palat ban ia ki skhim shimet ha ka Tnad Veterinary da kaba phaikhmat halor ka jingsumar ia ki mrad bad wanrah ia ka rukom treikam kaba ryntih.

Ula ong, “Ka hospital kan ym lah ban treikam lada ngim don ia ka ‘Hub’ bad ki ‘Spoke’ ban pynkhlain ia ki jingtei bad jingdonkam kum ki mashin, ki tiar sumar, ki dawai, ki briew ha man la ki kyrdan” ba ka ba jur ia ka jingkongsan ban kynjoh ia ka thong da kaba pyndep kawei hadien kawei ia ka kam.

Ula banjur ruh ba dei ban pyndep ia kane ka projek ha ka por kaba la buh bad ka jingtrei ruh kadei ban long kaba bha bad ban pynthikna ba kane ka Veterinary Hospital kan dei kawei na ki hospital kiba biang eh bad ka jaka wadbniah ha ka jingsumar ia ki mrad hapoh ka thain Shatei Lam Mihngi baroh kawei.

Ka State Veterinary Hospital kadei ka jingkynshew kaba kongsan kaba jan kot T.65 klur ha ka jaka ba 161 hektar jong ka Tnad, kaba batai ia ka jingkut jingmut jong ka Sorkar halor ka koit ka khiah ki mrad, ka jingkiew shaphrang jong ki nongri jingri bad ka ioh ka kot ki nongkyndong ba shaniah halade.

Ka State Veterinary Hospital kaba don mynta, kala shakri ia ka Meghalaya la bun snem, hynrei kala iakynduh jingeh namar ka jingrit ka jaka bad jingbym lah pynbiang ia ki tiar ki tar. Palat ia 25% ki mrad ba ai jingsumar man ka sngi kidei kiba wan na kylleng ki bynta ka Jylla, ka dak kaba shai ba donkam ia ka jaka ai jingsumar kaba heh, kaba khlain bad kaba long katkum ka juk stad ba mynta.

Ka State Veterinary Hospital ba thymmai kan tyrwa ia ki jingsumar katkum ka juk mynta, ki jingsumar da ki doktor Specialist, ka Radiology bad Imaging, Surgery, Orthopaedics, Inpatient Services, Laboratory bad Pharmacy bad ka Emergency Care kaban treikam baroh 24 kynta bad kiwei kiwei.