Pynlong ka Assam Rifles bad USI ban kynmaw burom ia u Maj Bob Khathing halor u syniang ia thain NE

Ka Assam Rifles ryngkat ka jingiatreilang bad ka United Service Institution of India (USI), New Delhi ki la pynlong ia ka Annual Maj Bob Khathing Memorial Lecture ha USI, New Delhi ha ka 21 Nailar 2026.

Ia kane ka Memorial Lecture la pynlong man la u snem ban kynmaw burom ia ka jingnoh synniang ba kyrpang bad ka pateng ba iaineh jong u Major Bob Khathing, u heh shipai bad riewstad ba pawnam uba ka jingim bad ka jingshakri jong u ka don ka jingiadei kaba jan bad ka thain shatei lammihngi bad ka jingiatylli jong ka ri.

U Lieutenant General Abhijit S Pendharkar, UYSM, AVSM, YSM, Director General Military Operations, u la plie pyrda ia ka jingialang kum u Kongsan bad u la ai ïa ka jingkren ba kongsan ha kaba u la ban jur ba ka jingpule ïa ka jingim jong u Maj Bob Khatings ka long kum ka jingpynkynmaw ba ka jinglong nongïalam ha ka thaiñ shatei lammihngi ka donkam ïa ka jingsngewthuh ïa ka jingpeit ia ka jingshngain bad ka imlang sahlang bad la pynkhlain ia ka jingiatylli jong ka ri da kaba tei ia ka jingshaniah ha baroh ki briew.

Ha ka jingkren plie pyrda, u Lieutenant General Vikas Lakhera, AVSM, SM, Director General Assam Rifles haba buh ïa ka phang na ka bynta ki jingïamir jingmut ha kane ka sngi, u la ban jur halor ka jingktah kaba ki jingïathuhkhana ha ki social media ki lah ban pynthut ïa ka imlang sahlang bad u la kyntu ïa ki samla ba kin kham husiar bad ban sngewthuh shaphang kum kine ki jingialap. U Vice Admiral Sanjay J Singh, SYSM, PVSM, AVSM, NM, PhD (Retd), DG USI u la ai ïa ka jingkren pdiang burom kaba rakhe ïa ka pateng ba riewspah jong u Maj Bob Khating kum ka jingsdang ia ka jingiakren.

Ka phang pdeng jong ka Memorial Lecture mynta u snem ka long “Ka Jingpynlong atiar ia ki rynsan Social Media ha ka thain shatei lammihngi ban pynsaphriang ia ki khana lamler pyrshah ia ki bor pahara bad ka jingai jingmut ia ki sienjam ban ialeh pyrshah ia kane.” Ia kane ka jingkren la ai da u Subir Bhaumik, u nongthoh khubor ba pawnam, u nongthoh bad u nongai jingmut shaphang ka thain shatei lammihngi bad ki kam pahara bad ki kam ba kongsan jong ka. Da kaba pyndonkam ïa ka jingshemphang bad jingsngewthuh kaba jylliew jong u shaphang kane ka thaiñ, u Bhaumik u la ïakren halor ka jingkylla jong ka jingtip ha ka thaiñ Shatei Lammihngi bad ka jingkiew ka jingpyndonkam ïa ki rynsan social media na ka bynta ban pynsaphriang ïa ki jingpynbna lamler bad ki jingpynbna pyrshah ïa ki kynhun shipai.

Ka jingiakren ka la peit bniah kumno ka jingpynlong atiar ïa ki social media ka lah ban ktah ïa ka jingsngew jong ki paidbah, ban wanrah ïa ka jingbym shaniah bad ban ktah jur ïa ka jingshaniah jong ki bor pahara. Ka la pynleit jingmut ruh ha ki jingeh kiba mih na ka jingpyntip bakla bad ki jingpynbna ba la pyniadei, katba ka ai jingmut shaphang ki sienjam kiba lah ban shim bad kiba treikam ban ialeh pyrshah ia kane.

Kane ka jingïalang ka la pynïasoh lang ïa ki heh shipai, ki riewshlur, ki riew shemphang ha ki kam, ki riewstad, ki riew shemphang ha ki lad pathai khubor, kaba la ai ka lad ban ïamir jingmut kaba don jingmut bad ban ïasam ia ki jingmut halor ka jingkylla jong ka jingai jingtip bad ki jingktah jong ka ïa ka thaiñ Shatei Lammihngi. Ka jingialang kylli jingkylli bad jubab ka la plie lad ia ki nongiashim bynta ban ïakren bad u nongkren halor ka phang. La pynkut ïa kane ka prokram da ka Jingkren ai Khublei na u Major General I S Bhinder, Inspector General Assam Rifles (East).

Ka Annual Maj Bob Khathing Memorial Lecture ka dang ïai bteng ban long kum ka rynsan kaba kongsan ban kyntiew ïa ka jingïakren ba bniah halor ki mat kiba katkum ka juk mynta kiba ïadei bad ka thaiñ shatei lammihngi, ka jingïshngain jong ka ri bad ki jingmyntoi jong ka India, katba dang pynsah jingkynmaw ïa ka kam jong u Major Bob Khathing.