Pynkup burom ka Kiang Nangbah Kolej ia ki samla pule ba ioh Grade O, A+

Ka Kiang Nangbah Govt College Jowai mynta ka sngi ka la pynkup burom ia baroh ki samla pule jong ka kiba la pyndep graduate ha une u snem 2026, ha ka jingialang batip kum ka Graduation Day Ceremony ba la pynlong ha Auditorium hall ka college.

Ha ka jingialang pynkup burom u Deputy Commissioner ka West Jaiñtia Hills District u Abhinav Kumar Singh IAS ula long u kongsan ha ka jingdonlang ki nonghikai naduh u Principal ka college u H.Toi, u B.N Lamare Rtd Principal uba long ruh u President Allumni Association ka Kiang Nangbah Govt College, ki samla dang pule mynta bad kiwei.

Ha kane ka jingleh burom la pynkup burom ryngkat ki certificate ia kiba wan shakhmat ha ka result kynthup ki ba ioh Grade O, A+ bad Grade A.

Nangta la ai certificates ruh ia ki nonghikai ba dei ki khlieh jong ki tnat pule bapher bapher.

U Deputy Commissioner Abhinav Kumar Singh, haba kren ha kane ka sngi ula ai khublei iaki samla pule ba kila lah ban jam shilliang ia u mawmer ka pule puthi haka jingim, da kaba ong ruh ba ka jingtreishitom bad ka jingshlur ki long kiba kongsan ha ka jingim ha ryngkat ka jingkyrshan bad ai mynsiem lang ki nonghikai bad ka iing ka sem.

Haba pynkynmaw iaka nuksa u Kiang Nangbah kumba ia kane ka college la ainam haka kyrteng jong u, bad ruh kumba ka ktien imsngi ka college ka ong, “Awake, Arise and reach the Goal”, u la kyntu iaki samla bala pyndep graduate ba kin bud ia kine ki nuksa bad ban long shlur.

U kyntu ruh ia kiba la pyndep jingpule na kane ka college ba kin long kiba sngewrit, ba trei shitom bad shlur lada dei naka bynta ban bteng iaki jingpule ba kham shalor, lada dei ban trei ha ka kam paidbah, ka kam lajong ne sengkam sengjam bad kiwei.

U pynpaw ruh ba ka jingnang jingstad kam dei ban sahkut tang ha ka jingjop marwei shimet hynrei ban pyndonkam ruh iaka naka bynta ka bha ka miat jong ka imlang sahlang bad ka jaitbynriew.

Haba bynrap ia ka jingnoh synñiang jongki nongialam, ki nonghikai, ki nongtrei, ki kmie ki kpa bad ka kynhun Ki nongpule (Alumni Association) na ka bynta ban saiñdur ia ki sanla pule, u kyrmen ba ki samla bala pyndep jingpule ruh kin iatreilang ban rah ia ka nam ka burom jong kane ka college.

Kiwei pat ba kren ai mynsiem ia ki samla kynthup u H.Toi Principal Kiang Nangbah Govt College bad B.N Lamare Retd Principal uba dei ruh u President of Allumni Association.

Ha kane ka sngi la ioh ruh ki jingrwai na ki samla pule kane ka college.