Phah jingthoh ka sorkar sha ka KSU ban wan iakren halor ki mat jingdawa

U Myntri Rangbah ka Jylla u Conrad K Sangma hynne ka sngi ula pyntip ka sorkar ka dang ap na ka Khasi Student Union (KSU) ia ka jingkhot ban iakren halor 5 tylli ki mat jingdawa.

Haba kren sha ki lad pathai khubor u Conrad ula iathuh ka sorkar ka la phah shithi sha ka KSU ban iakren, hynrei haduh mynta na ka liang ka KSU kam pat phah ktien ne jubab.

“Ngi la phah ia ka shithi ban khot iakren ia ka KSU hynrei haduh mynta ngim pat ioh jubab” la ong u Conrad.

U Conrad ula iathuh ba ka jingiakren ka dei beit halor ki 5 tylli ki mat ba ka KSU ka la thoh bad buh hakhmat ka Sorkar Jylla.

Halor ka jingkynnoh ka sorkar ka khlem leh eiei ia ki jingdawa ka KSU u Myntri Rangbah ula ong, ba kam long kumba la kynnoh namar bun ki mat la iakren bad ki la iaid shakhmat, hynrei ka lah ban don ka jingpynsngewthuh bakla bad kat ba don ki mat ngin iakren ha ka jingialang ki dkhot ka KSU.

“Ngin pynshai ia kaba donkam ha ka jingiakynduh bad ki dkhot ka KSU ne kiwei ki sengbhalang kiba ha ka miej jingiakren, ka sorkar kan shimkhia ia ki mat jingdawa. Ha ka jingkynduh ngin iakren shai ia kaei kaba lah ban leh bad ka bym lah bad ia kaba ngi lah ban leh ngin ai ka jingkular ban pyniaid shakhmat ia ka kam” la ong u Conrad bad ula bynrap ka don ka jingbym biang ban ai ktien ban don ka jingialang ban iakren ia ki mat jingdawa ka KSU.

Halor ka jingdawa ban pyllait ia ki Nongialam ka KSU bad ban weng ia ka MMPO/MPDA pyrshah ia ki, u Myntri Rangbah ula ong ba ka ain kan iaid la ka jong ka lynti.

“Ka ain ka don halor ka nongrim bad kaei kaba jia kan shim la ka jong ka lynti bad kam bha bad kam long ia nga ban kren ia ki rule ki ain kin kylla tang namar kawei ka Sengbhalang lane ki riew shimet. Kumta ai lad ba ka ain kan ia kaba donkam shim na bynta ka jingbhalang” ula ong.