Kwah u Conrad ban wad bniah ia ka Tynrai bad ka Histori ka Meghalaya

U Myntri Rangbah ka Jylla u Conrad K Sangma hynne ka sngi, ula plie paidbah ïa ka projek wad bniah ka Sorkar Jylla ba la jer kyrteng “Tracing the Roots” ha District Auditorium, Tura, kum ka jingkynmaw burom ïa ka sngikha ba 79 jong u kpa jong u ba la khlad, u Purno Agitok Sangma.

Ha kane ka jingialang la donlang naduh u Myntri ka tnad Arts and Culture ka sorkar jylla Bah Sanbor Shullai bad ka MLA jong ka Gambegre ka Mehtab Chandee A Sangma, ki heh ophisar sorkar, ki riew shemphang bad kiwei kiwei.

Haba kren ha ka jingialang u Myntri Rangbah ula ong, ba kane ka prokram, ka long ban wad bniah da ka jingstad saïan ïa ka tynrai jong ka Meghalaya bad ka histori jong ka, kaba mih na ka jingai jingmut u Lamphang barim ka Lok Sabha u P A Sangma.

Da kaba pynkynmaw ïa ka jingïakren bad u kpa jong ha ka por ba u dang im, u Conrad u la ong, “Ka la long kawei na kita ki jingïakren ba ju long hapdeng u kpa bad u khun. Hynrei haba nga phai dien mynta, nga sngewthuh ba man la ka jingïakren ka don ka khubor ba khlaiñ. Ka la long kum ka klas na bynta jong nga, ka lynti kaba pyni ïa ka jingim bad ïa ka Jylla.”

Ula ong ba u P A Sangma ula pynpaw ïa ka jingsngewkhia halor ka jingduna jong ka jingbuh jingthoh katkum ka juk stad mynta shaphang ka tynrai, ka histori, ka jingwan buhai shnong bad ka kolshor jong ki briew ka Meghalaya, khamtam eh ki Garo.

Ula ong ba kane ka jingiakren kala sah ha ka jingmut jingpyrkhat ka jongu bad da kaba buh jingmut ïa kane, kumba ar snem mynshwa, ula rai ba dei ban sdang ïa ka prokram ban pule bad wad bniah ïa baroh ki liang jong ka kolshor bad ka histori jong ngi bad ban pynmih da ka rukom saïan ïa ki sakhi halor ka tynrai bashisha jong ki briew ka jylla.

U Conrad ula ong, ba kane ka jingwad bniah kaba kynthup ïa bun ki bynta jong ka jingtip kan kynthup ïa ka jingwad bniah halor ka histori, ka pateng, ka jingtip tynrai, ka ktien, ka jingwad ïa ki dak jong ka juk mynbarim bad ka jingpule ïa ki kot bad jingthoh kiba la buh ha ki thup rim, ban wad ïa ki tynrai bad ki buhai shnong ha ka histori jong ki Garo, Khasi bad Jaintia.

Ula iathuh ba 75 ngut ki Scholar kin leit sha Vietnam, Cambodia bad Tibet ban wad ïa ki jingïadei ha ka imlang-sahlang bad ka kolshor hapdeng ki jaitbynriew jong ka Meghalaya bad ki ri jong ka dewbah Southeast Asia.

Katba ka jingwad bniah halor ki Khasi-Jaintia ka don ïa ka kyrteng “Ki Dienjat: Re-examining Khasi-Jaintia Socio-cultural Linkages with Southeast Asia”, ka bynta kaba ïadei bad ki Garo kan wad bniah halor ka jingmut ba ki Garo ki don jingïadei bad Tibet bad kibynta ba shatei jong ka pyrthei.

U Myntri Rangbah u la plie ruh ïa ka e-portal kaba kyrpang na bynta kane ka projek, kaba kan long kum ka jaka pdeng ban lum ïa ki jingtip na ka jingwad bniah, ki digital archives, ki jingpynmih kot bad jingthoh jong ki scholar, bad ki jingdonkam ha ka pule puthi.

Katba u Bah Sanbor Shullai ula ong, ba kum u Myntri u sngewkmen ba ula ioh ban don bynta lang ha kane ka prokamei ban pynlong ia ka jingwad bniah kaba janai ia ka tynrai jong ki Garo bad ula pynkynmaw ba dang shen ki la dep ban pyllait ia ka thup wad bniah kaba ia dei na ka bynta ki paid Khasi bad Jaintia.