Ki Nonghikai ki long ki atiar ba khlaiñ ban saindur ia ka jingim ki khynnah skul: Dr C Lyngdoh

Ka Ophis u Joint Director of School Education & Literacy, Ribhoi District, Nongpoh lem bad ka ophis District School Education Ophisar, Ribhoi District bad ka Sub-Divisional School Education Ophisar, Ribhoi District, Nongpoh mynta ka sngi ki la rakhe burom ia ka Teacher Day ba 65 ïa kaba la pynlong ha Parish Hall Nongpoh.

Ka 5 tarik u Nailur ka dei ka sngi kynmaw burom ïa ka sngi kha u Dr. Sarvepalli Radhakrishnan, uba dei u President barim jong ka ri bad uba la ïoh ruh ïa ka khusnam Bharat Ratna award bad dei halor kane ka nongrim ka ri baroh kawei ka kynmaw burom ïa kane ka sngi da kaba rakhe ïa ka sngi kyrpang jong ki Nonghikai.

Haba ïadei bad kane ka sngi naka liang ka Tnad pule puthi, Ribhoi District ka la khot sngewbha ïaki katto katne tylli ki skul kiba napoh ka district ban pyndon burom ïaki Nonghikai Skul daka ba ïa shimbynta lang haka shad ka rwai, ka put ka tem bad kiwei kiwei kaba la wan rah ruh ïaka dur phuh samrkhie jong ki Nonghikai bad kiwei kiwei de kiba wan ban sakhi lang.

Ha kawei pat ka bynta jong katei ka program ka tnad Pule Puthi ka la ïoh ban sam ïaka khusnam District Best Teacher’s Award bad ïa kane ka khusnam la ïoh ban pdiang da u Bah Aibor Singh kharpan u Nonghikai ka Nehru Memorial Hr. Sec. School, Umsning ha kajuh kapor la pyndonburom ruh ia ki katto katne ngut ki Nonghikai kiba long ki khlieh duh jong ki skul kiba la treishitom ban sam iaki jingnang jingstad sha ki khynnah skul.

Ha kane ka sngi burom ki Nonghikai la wan ban Sakhi Lang da u MLA Umsning Constituency, Dr. Celestine Lyngdoh kum u kongsan, U Bah Mayralborn Syiem MLA ka Nongpoh Constituency symbut kongsan, Deputy Commissioner ka Ribhoi u Dr Abhishek Saini, Bah R Shadap DSEO Ribhoi, P.P Yadav SDSEO Ribhoi ki Nonghikai, ki Khynnah skul lem bad kiwei kiwei.

U Dr. Celestine Lyngdoh Kum u kongsan u la ai jingiaroh ia baroh ki Nonghikai kiba long kum ki atiar kiba khlaiñ tam ban pynwandur ia ka jingim jong ki khynnah skul bad kiba saiñ dur ruh ia ka Lawei. U la ong ruh ba dei lyngba ka jingtrei Shitom jong ki Nonghikai bad ngin sa lah ban long Briew man briew haka jingim jong ngi.

U la ong ruh, ka kam Nonghikai ka dei ka kam kaba don burom bad u la ong ba lada ioh ia ka lad sa shisien un jied ia ka kam ban long kum u Nonghikai namar ba dei tang ka kam hikai kaba lah ban hikai kumno ban im ka jingim kaba iaid beit ïaid ryntih ban bud ryngkat bad ka por.

U Dr. Celestine Lyngdoh kum u kongsan u la kyntu ruh ia ki khynnah skul ba kin sngap ia ki jingsneng jingkraw jong ki Nonghikai bad ban bud ryntieh ruh ia ki jinghikai namar ba ki Nonghikai ki long kum ki kmie ki kpa ki baar haka jingim jong ngi ki Briew.