Pyllait u Lamphang ïa ka kot jong u MR barim u Bah BB Lyngdoh

U Lamphang ka Iing Dorbar Thawain ka jylla u Thomas A Sangma hynne ka sngi ula pyllait paidbah ia ka kot jong u bah B.B. Lyngdoh uba dei u Myntri Rangbah barim ka jylla Meghalaya.

Ia kane ka kot jong u bah B. B Lyngdoh la thoh da u bah Andrew Simon u Commissioner & Secretary barim ka Meghalaya Legislative Assembly bad uba dei ruh u Adviser ba mynta.

U bah B.B. Lyngdoh, udei udei uwei na ki nongialam uba la shakri kum u Myntri Rangbah ka Meghalaya ba nyngkong haduh saw sien bad ula long uwei na ki nongialam ba pawkhmat uba la synniang shibun ia ka roi ka par bad ka jingsan ka sain pyrkhat ka sain hima ha ka Jylla.

Haba kren ha kane ka sngi pyllait kot, u Thomas u la ong ba ka jingim jong u bah BB. Lyngdoh ka la iasnoh jan bha bad ka jingpynkyndit bynriew ia ka sain pyrkhat ka Jylla, udei uwei na ki nongialam uba don ka jingiohi jngai bad udei u nongthawain ba tbit.

Ula ong ba ka jingtbit jong u BB Lyngoh ban ialam bad pyniasoh ia ki kynhun sain pyrthei bapher bapher ban pynneh ia ka synshar kaba skhem ka long ka jingjop kaba khraw, khamtam ha ka por ba ka sain-pyrthei ka dang khihwin bad shuwa ban wanrah ia ka ain kyntiap seng ka anti-defection law.

Katba na ka liang u bah Andrew Simon, ula ong ba kane ka kot ka long ka jingpyrshang ban thoh bad pynneh ia ka synniang ba la noh da une u nongialam.

U bah Andrew ula kdew ha ka kot halor ka jingwanrah u bah BB Lyngdoh ia ka MLA Scheme bad ka jingtbit jong u ban pyniaid ia ki sorkar synrop ha ka por kaba jwat bha ka sain pyrthei.

U bah Simon ula ong ba kane ka kot ka la shim por kumba lai snem ban pyndep bad ula pynpaw ia ka jingsngewnguh ia ka khun jong u bah BB.Lyngdoh, ka Kong Syrpailin Khonglah, kaba la iarap ban pynbiang ia ki jingkynmaw, ki kot ki sla nalor kiwei de ki jingdonkam.

Na ka liang ka Kong Syrpailin Khonglah, ka khun jong u bah BB Lyngdoh, ka la pynkynmaw ia ki nonngrim jong u kpa jong ka bad ka thong jong u ban iohi ia ka jylla Meghalaya ban san bad ban kiew ha ka ioh ka kot.

Ha kane ka sngi la iadonlang ruh da u Deputy Chief Whip ka Sorkar u bah Ronnie V Lyngdoh, u Chairman ka MIDC bad u MLA ka Sohra u bah Gavin Miguel Mylliem, ki MLA barim kynthup u bah Martle N Mukhim bad u bad Titostarwell Chyne, u Chief Secretary barim u bah WMS Pariat, ka Chairperson ka Meghalaya State Commission for Women ka kong Iamonlang Syiem, ki bahaiing hasem jong u BB Lyngdoh nalor kiwei de.