Plie u Conrad ïa ki projek kam pynroi ha Tikrikilla bad Raksamgre, WGH

U Myntri Rangbah ka Jylla u Conrad K Sangma mynta ka sngi, ula plie paidbah ia bun tylli ki kam pynroi bad buh maw nongrim ia ki project kiba kongsan ha Tikrikilla bad Raksamgre ha West Garo Hills.

Ia u Myntri Rangbah la synran da u Myntri ki kam jngohkai Timothy D Shira, u Symbud Lamphang u Limison D Sangma, u MLA u Jimmy D Sangma bad u CEM ka GHADC u Dhormonath Sangma ryngkat ki Heh Ophisar jong ka District.

U Conrad ula plie paidbah bad buh mawnongrim ia ka jingkieng maw (PWD Roads) ha Jangrapara, Raksamgre, plie ia ka Tourism Guest House bathymmai ha Nagargaon, Tikrikilla, buh mawnongrim na ka bynta ka Tourism Guest House bathymmai ha Raksamgre.

U Myntri Rangbah ula plie paidbah ruh ia ka Agro Processing Unit shimet ba dang shu plie thymmai-ka Megha Agro Gold ha Tikrikilla, ka ban tylliat ia u kwai, sohtrun bad sohphan ba pynmih na ka thain.

Haba ai jingkren, u Myntri Rangbah ula ong, ba ka Sorkar kala pynleit jingmut ha ka roi ka par bad ka jingkiew shaphrang jong ki jaka nongkyndong bad ki jaka ba don sha jngai eh jong ka Jylla.

“Ka jingpyniasoh surok kadei kaba iasoh beit beit bad ka jingroi ka ioh ka kot bad kyntiew ia ka kamai kajih. Ta ka daw ngi la buh hakhmat eh ia ka kam shna surok” ong u Myntri Rangbah.

Ula ong ba ka surok na Baghmara sha Rongara mynshuwa ka ju shim por kumba 3 kynta hynrei mynta ka shimpor tang 30-45 minit. Na Rongara sha Ranikor kaba ju shim por mynshuwa 3 kynta, mynta ka shim por tang 1 kynta bad ka pyntip ba ha ki 7-8 snem bala leit, ka Sorkar kala shna ia jan 3,500 km ka surok thymmai ha ka Jylla, kaba long 1.1km ka surok man ka sngi bad ia kum kane ka jingshna surok ym pat ju sakhi ha ki 20 snem kiba la leit noh.

Haba kdew ia ki jingpyniasoh ban sa leh hadien, u Myntri Rangbah ula ong ba ka jingkieng Dhubri-Phulbari, ka project ba T.3,500 klur bad ka jingkieng kaba jrong eh ha ka thain lam mihngi, kala jan dep artad bad kane ka jingkieng kan plie ia ka lynti jong ka khaii pateng na ka bynta ka thain Shatei Lam Mihngi baroh kawei.

“Ngi la tyrwa ia ka surok kaba heh bha-Dalu sha Baghmara, Baghmara sha Ranikor, Ranikor sha Shella bad Ratacherra shaduh sha khappud ka Bangladesh. Ynda la pyndep ia kane, kan sa pyniasoh ia ka Silchar, Manipur, Mizoram bad Tripura bad kan pynkylla ia ka khaii pateng bad ka iaid ka ieng ha ka thain” ula ong.

U Myntri Rangbah ula iaroh ia ka GHADC hapoh ka jingialam u CEM Dhormonath Sangma bad ia baroh ki MDC kiba la wanrah ia ki jingpynkylla kiba khraw hapoh ka Council bad ula pyllait ruh ia artylli ki prokram jong ka Council kaba kynthup ia ka GHADC Patta Management System (PMS) Portal, ka rynsan digital ban pynbeit ryntih ia ki dulir khyndew bad jingpyniaid ia ki patta bad ia ka Service Conduct Rules Book, ka Rulebook kaba bniah na ka bynta ka jingtreikam bad ka rukom treikam jong ki nongtrei ka Council, kaba thmu ban wanrah ia ka jingtreikam kaba tbit, kaba don jingkitkhlieh bad kaba don discipline.

Halor ka Separate Electoral Roll (SER), haba niew kum ka rai kaban sah khana, u Myntri Rangbah ula ong, “Ka SER kadei ka rai kaba heh bha. Ngi la mynjur ia ka rules bad la pynbeit shisyndon ia ka jingeh kaba la sahteng la slem bha. Ki bar Jylla kim dei ban sngewmong. Ngim long pyrshah ia kano kano ka jaidbynriew. Ngi la ia imsuk imsain da ki snem bad ngin iai im lang bad iatrei lang. Kane ka rai ka long kaba donkam ban wanrah ia ka jingshai bad ban iada ia ka bha ka miat jong ka jaidbynriew riewlum jong ngi”.