Shah beh u Bah Hoping na ka APHLC ba kyntait ia ka Autonomous State

Ka Hills State People’s Democratic Party (HSPDP) hynne ka sngi ha ka jingialang kynmaw burom ia ka lyngkhuh sngi iap ba 11 jong u Ma Hoping Stone Lyngdoh, ka la pynlong ia ka ‘Biographical Symposium’ ha Shillong Club.

Ha kane ka sngi la donlang kiba haiing hasem jong u Maieid Hoping Stone, ki nongialam ka party, ka nongwad bniah ka Associate Prof, Dr. Jayanti Shadap, u Myntri sorkar jylla u bah Methodius Dkhar uba long kum u kongsan nalor kiwei.

Ka Dr. Jayanti Shadap ka nonghikai Political Science ha St. Edmunds College haba kren ha kane ka sngi, ka la pynkynmaw ia ki kam ba la leh da u Ma Hoping Stone Lyngdoh na bynta ban pynioh ia ka jylla ba pura.

Ka Dr. Shadap ka la ong ba u bah Hoping u ieng ha ka nongrim ba dei ban ioh ia ka jylla pura ym ia ka Autonomous State kaba ka All Party Hill Leaders Conference (APHLC) ka la pdiang ha ka jingialang kaba la lang ha Tura.

Ka la pynkynmaw ba dei ha ka jingialang kaba la long ha Tura ba ki nongialam ka APHLC ki pdiang ia ka Autonomous State ba tyrwa ka sorkar pdeng bad u bah Hoping u pyrshah dei ha katei ka sngi ki beh noh ia u na ka party APHLC bad dei hangne ba u sa seng ia ka HSPDP.

U bah Methodius Dkhar ula ong ba kane ka sngi, kam dei ba ki kynmaw tang ia ka sngi ba u khlad, hynrei ka long ban sngewthuh ia ki kam ba ula noh synniang ha ka jingim jong u ban shakri ia ki paidbah ka jylla.

Ka Histori jong ka HSPDP bad ka khana jong u Ma Hoping Lyngdoh ym lah ban pyniakhlad na ka histori jong ka jylla Meghalaya.

U la ong ba u Ma Hoping naduh shwa ban ioh ia ka jylla ba pura, u la don ka jingiohi jngai ba ka jylla Meghalaya ka donkam ban ioh ia ka jylla ba pura.

U bah Methodius ula ong ba haduh mynta ka jylla ka dang shaniah tylli ha ka sorkar pdeng ban bei tyngka ia ka jylla, namar kata ka long kaba ai mynsiem bha ban pule ia ka kot bad ka jingim jong u Ma Hoping ba ka jingthrang bad ka thong jong u ban iohi ba ka jylla Meghalaya kan long kaba lah ban pyndap pynbiang na lade.

Ha kane ka sngi la ioh ruh ka jingkren na u President ka HSPDP u bah Pangngiang, u MLA/MDC barim u bah Martle N. Mukhim, nalor kiwei de.