Kawei ka kamra klass uwei u nonghikai

Hadien ka jingud jingnam jong ki nongshong ka Hynniewtrep Youth Council (HYC) Keniong bad Thiepdingan Unit mynta ka sngi ka la hiar jurip ia ka Thiepdiengan Deficit Lower Primary School ha ka shnong Thiepdiengngan, Keniong, kaba hap hapoh ka Ranikor Civil Sub Division, South West Khasi Hills District ha kaba ka la lap shibun ki jingduna naduh ka ïing skul, ki kamra klass, ki ben, ka umbam umdih bad kiwei kiwei.
Ha kane ka jingjurip, ka HYC ka la lap ruh ba kane ka skul ka don tang kawei ka kamra klas na ka bynta baroh klass, kata, naduh Class-I haduh Class-V, bad ka don ruh haduh 50 ngut ki khynnah skul, hynrei tang uwei u nonghikai. Kaba kham sngew thamula ka long ba ia ka ophis jong ka skul ruh la hap ban pynlong kum ka kamra klass na ka bynta ka jingbit jingbiang jong ki khynnah skul.
U Secretary jong ka Managing Committee, Bah Beatarland Thongni uba la ïathuh ba ha ka jingshisha kane ka skul ka don arngut ki nonghikai, hynrei naduh ba la shongthait noh uwei u nonghikai naduh u bnai Naitung jong u snem 2025 ka sorkar ka la pynslem bad kam shym pat la thung bujli da kiwei wat la dep ban leh ïa ka written test naduh u bnai jylliew jong u snem 2026 bad kaba sah ka long sa tang ka personal interview.
Ka seng ka la pynpaw ruh ba kan nym shong thait kan sa leit ban ïakynduh ïa u SDSEO ban tip shai ba balei ban pynslem ïa kane ka personal interview.
Ka seng ka la pynpaw ruh ïa ka jingsngew bynniaw bad kubur ba ka jinghiar ka pule puthi hapoh ka jylla ka dei beit ha ki skul ha nongkyndong, wat la ki skul ki don ha man la ki shnong, hynrei kaba sngewsih ka long ba don tang ki skul, ki building hynrei ki kamra klass kim don kumba long ka skul hangThiepdiengngan Keniong kaba la seng ïa ka naduh ka snem 1983 kaba dei kawei na ki skul hapoh shnong Thiepdiengngan Keniong kaba la sei shibun ki riewstad riew shemphang.
Hynrei mynta kane ka skul ka la hiar bad duna ki khynnah kiba wan pule namar ka jingbym biang
ki kamra klas bad ka jingbym biang ki nonghikai .
Kumta ha kaba ïadei bad kane, ka seng kyrpad jur ïa ka sorkar bad ïa u local MLA u bah Pius Marweiñ ba kin phai khmat lem sha kane ka skul
ban ai jingiarap lem naduh ka building bad ki kamra klass kiba biang, ha kajuh ka por ka seng ka kyrpad ïa ka sorkar ba kadei thung noh kloi ïa ka post kaba dang lait khnang ba kane ka skul kan long ka jingmyntoi bad ka jingkyrkhu ïa ka lawei jong ki khynnah.
Na ka liang ka HYC, la ai jingkren da u General Secretary, samla Jewelstone Thongni bad u Education Secretary, samla Brigadier Sanglyne.