Mynta sdang Meghalaya Games ha Jowai La poi lut ki nongïalehkai, khynnah  duh kiba ïalehkai Gymnastics

Mynta ka 19/01/2025 dei ka ka sngi ba baroh kiba shim bynta ha ka lympung ialehkai jong ka 6th Meghalaya Games 2025 ki ia poi lut ha Jowai, West Jaiñtia Hills District namar naduh la shai 20 tarik ki jingialehkai kin sdang noh, lait noh ka jingialehkai bol kaba la sdang shwa ha kine ki sngi na ka daw bym lah pyndep kloi kumba long ia kiwei ki jait jingialehkai. Kumta na ka liang ka West Jaiñtia Hills District kala pdiang sngewbha ia baroh kiba ialehkai na ki District bapher bapher ka jylla haka jaka ba la pynkhreh ha Mukhla, haka jingdonlang u MLA ka Jowai, u Wailadmiki Shylla, ki bor peit bor pyniaid ka District, kiba lamkhmat ka Meghalaya State Olympic Association, kiba napoh ka tnat Sports & Youth Affairs ka sorkar jylla bad kiwei.

Ia baroh ki nongialehkai ha kane ka sngi la pdiang burom da kaba pynkup ryndia tlem, kumjuh ruh ka jingai muna, ki ID bad kiwei nalor ba la pynkhreh ruh ia ki ka sha bad jingbam. Haba iakren bad ki katto katte ngut ki rang bad thei ialehkai bad ki official jong ki la iathuh halor ka jingwan jong ki shapoh ka West Jaiñtia Hills District kumjuh sha Jowai ban shim bynta ha ka 6th Meghalaya Games, ha kaba ki la pynpaw ka jingkmen bad khmih lynti ruh ba kin ioh rah nam jop ha ki jingiakhun ba kin shim bynta.La ioh lad ruh ban iakren bad u MLA ka Jowai uba la khmih lynti ba kumba la iatrei shitom naduh ki sngi ba la dep, ka jingialehkai kan long kaba jop ha baroh ki liang.

Te kumba la ia poi lut ki rang bad thei ialehkai na ki District bapher bapher ula kyntu ruh ia ki paidbah ka West Jaiñtia Hills District khamtam ka shnong Jowai ban long kiba iatreilang ha kino kino ki bynta bad ban pdiang burom ruh ia kiba wan nabar ha ka jingiadei bad kino kino ki jingdonkam jong ki namar lehse don kiba poi Jowai dang ha ka sien banyngkong. Ha kane ka Meghalaya Game mynta u snem kin don ki nongialehkai haduh 3500 ngut ki ban shim bynta ha ki 29 tylli ki jingialehkai bapher bapher.