Hadien 53 snem ka jingioh Jylla, plie u MR ia ka Mawhati Block

Ka long ka sngi ba kmen bad sah kynmaw ia ki paidbah nongshong shnong ka thaiñ Mawhati, ba ka jingangnud da ki phew snem ka la urlong ha kaba u Myntri Rangbah u Conrad K Sangma hynne ka sngi Saitjain ula plie ia ka ophis ka Mawhati C&RD Block ha ka jingialang ha Umsohlait. Ha kane ka sngi la donlang u AT Mondal, Myntri ka Tnad Community and Rural Development, u Bah Charles Marngar, MLA ka Mawhati, u Dr. Celestine Lyngdoh MLA ka Umsning, u Deputy Commissioner ka Ri Bhoi District u Abhilash Baranwal nalor kiwei ki heh ophisar lem bad ki riew rangbah ka thaiñ Mawhati. Haba kren ha kane ka sngi, u Bah Charles Marngar kum u nongmihkhmat ka Mawhati u la pynpaw ia ka jingkmen ba khraw bad ai khublei kyrpang ruh ia ka sorkar jylla ba la lamkhmat da ka NPP kaba la lah ban pynurlong ia ka jingangnud bad ka jingphohsniew jong u paidbah ka Mawhati ban ioh noh la ka jong ka Block kata hadien 53 snem ba la ioh ia ka jylla bad lyngba kane ka ophis yn lah ban pyntyllun ia ki kam pynroi bapher bapher bad ki paidbah kim donkam donkam shuh leit sha Umsning kumba long mynshwa.

U la pynpaw ruh, ba watla ka la don ka jingkynthoh kaba jur ia u halor ka jingleit pyniasoh sha ka party NPP ha kine ki khyndiat bnai, hynrei kum u nongmihkhmat um don kano kano ka jingsngeweiei namar ba u sngewthuh ba ka jingleh pyniasoh jong u sha katei ka party ka dei hi na bynta ka jingmyntoi jong u paidbah ha kaban wanrah ia ki kam pynroi bad  ki jingdonkam bapher bapher. Haba kren kum u kongsan ha kane ka sngi, u Conrad K Sangma u la pynpaw ia ka jingkmen ba khraw ban lah pynurlong ia ka jingangnud jong u paidbah ka Mawhati, da kaba pynpaw ruh, ba kum ka sorkar jylla hi kan nang iai treishitom kumno ban wanrah ia ki lad pynroi kiba bun ha ki shnong ki thaw ka jylla, da kaba ai khublei ruh ia ka jingshimkhia jong u Myntri ka tnad C&RD u Bah AT Mondal kumjuh u MLA ka Mawhati kiba la long ka dawbah halor ka jingurlong ka jingangnud jong u paidbah ka Mawhati.

U la pynpaw ruh, ba ka thong jong ka sorkar jylla hi ka long ban nang wanrah ia ka jingsynshar kaba jan bad u paidbah khamtam ka jingdon jong kane ka ophis C&RD Block kan nang pynmyntoi shikatdei ia u paidbah ka Mawhati ha kaban pyntyllun ia ki skhim pynroi bapher bapher bad shen na ka liang ka sorkar kan nang pynsuk ruh ha ki jingpyntrei ia ki kam lyngba ki kor internet katkum ka juk ba mynta ban pynpoi ha baroh ki ophis Block lyngba ki Optical Fibre.