klur pynlut ka sorkar ban pynneh 16 spah ki tyllong um

U Myntri Rangbah ka jylla u Conrad K Sangma ula pyntip ba ka sorkar ha ki san snem ka la shna 1601 tylli ki wah duid ha ka jinglut ba T.46.62 klur hapoh ka skhim shispah sngi ka MNREGS. Haba jubab ia ka jingkylli ba la wanrah da u MLA ka VPP na Mawryngkneng u bah Heavingstone Kharpran, u Conrad ula ong ka jylla baroh kawei, ki don 70 hajar tylli ki wah duid bad na kine, 55,000 ki dei kiba la pruid dak da ki tiar juk stad ban peit ban iada na ka jingshah pynjot bad ki don 792 tylli ki wah duid kiba la jan rngad noh. “Ka tnad Soil and Water Conservation ka la shim ia ki lad ki lynti ban pynkhie im biang ia ki 792 tylli Wahduid kiba la jan rngad,” ong u Myntri Rangbah ka jylla.

Ula ong ba ia kine ki wah duid la peit bad sumar da ki shnong ha ki shnong bapher bapher ha ka jylla bad ha kane ka skhim, la ker kynroh, thung dieng, shna pung, pynkhuid ia ki tyllong bad kiwei. Halor ka jingkylli la kan ktah ne em ka projek ropeway ia ki tyllong um ha thain Lum Shyllong, u Myntri Rangbah ula ong ba kam don namar ba la leh lyngba ka jingleh bniah da ka jingiadon bynta lang ki tnad sorkar bapher bapher naduh ka tnad Forest, Soil & Water Conservation bad ki agency nabar ri bad kam don eiei ka jingpom ia ki dieng.

U Myntri Rangbah ula pyntip ruh ba ka sorkar kan pyntreikam ia ka projek kaba 62 million Dollar hapoh ka Asian Development Bank na bynta ban pynthymmai ia ki wahduid.  Halor ka jingkylli bynrap ba la buh da u MLA ka VPP u bah Adelbert Nongrum, u Myntri Rangbah u la ong ba ka jylla ka ioh pdiang slap 63 billion cubic man ka snem bad 30 million la tuid sha Bangladesh, 30 million eiei la tuid sha Assam namar ka jingbym don ka lad ban pyllang, bad ka jingpynsuki ia ka jingtuid ka um. Kawei pat ka dei namar ba ka jingbym biang ka rukom sam ia ka um.